Pozhari kujton masakrën e tmerrshme në Gjakovë: I vranë dhe i dogjën, prisnim kur do të na vinte radha neve

Gjakova

Pozhari kujton masakrën e tmerrshme në Gjakovë: I vranë dhe i dogjën, prisnim kur do të na vinte radha neve

Nga: A.ZH Më: 2 prill 2022 Në ora: 15:20
Xhevdet Pozhari

Gazetari Xhevdet Pozhari, ka kujtuar masakrën e forcave serbe në Kralan të Gjakovës, ku u vranë dhe u më pas u djegën 20 persona.

Pozhari ka thënë se Gjakova ishte tronditur në datën e kobshme të mesnatës mes 1 dhe 2 prillit të vitit 1999, pasi në shtëpinë e Vesajve  ndodhi masakra më e tmerrshme.

Tmerri i kësaj date u shënua edhe me vrasjen e 57 civilëve të tjerë në po të njëjtën lagje.

Postimi i tij në Facebook:

Sot fëmijët e familjes Vejsa, Hoxha, Haxhiavdija, Caka dhe Nushi me siguri do të ishin profesorë, mjekë, sportistë apo veç njerëz të ndershëm të këtij vendi që do të mundoheshin ne mish e me shpirt të kontribuonin për të mirën e përgjithshme. Ata do ta shijonin dashurinë, lumturinë, dhimbjen, zhgënjimin, shpresën si të gjithë ne sikur mos të vinte data e kobshme e mesnatës që ndante 1 dhe 2 prillin e vitit 1999.

Atë natë, Gjakova u trondit me lajmin se kishte ndodhur masakra më e tmerrshme në shtëpinë e Vejsave. Forcat e njësiteve paramilitare kishin hyrë në shtëpinë ku strehoheshin ëngjëjt, fëmijë të moshës prej 2 vjeç deri në 14 vjeç duke i vrarë pamëshirshëm 20 persona, prej të cilëve 14 fëmijë. Vetëm një copë mish ishte gjetur nga gjurmët e këtij gjenocidi pasi që kufomat e tyre i kishin djegur dhe shkrumbuar. Një fëmijë shpëtoi nga breshëria e plumbave. Dhe, iku mes flakëve.

Tmerri i kësaj date u shënua edhe me vrasjen e 57 civilëve të tjerë në po të njëjtën lagje. Burrat dhe djemtë e rinj u morën peng dhe më pas u zhdukën.

Të gjitha këto tmerre i përjetuam ne që në Gjakovë e prisnim kur do të na vjen radha neve....

U prehshi në parajsë, ëngjëj!

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat