Kruajtja vaginale është një simptomë e pakëndshme dhe ndonjëherë e dhimbshme që shpesh ndodh për shkak të substancave irrituese, infeksioneve, menopauzës dhe jo vetëm.
Shkaqet
1. Irrituesit: Ekspozimi i vaginës ndaj kimikateve irrituese mund të shkaktojë kruajtje. Këta irritues mund të shkaktojnë një reaksion alergjik që krijon skuqje në zona të ndryshme të trupit, duke përfshirë edhe vaginën. Irrituesit e zakonshëm kimikë përfshijnë: sapunin, sprucues, kontraceptikë, kremra, pomada, detergjentë, zbutës pëlhurash, letër tualeti me aromë etj.
2. Sëmundjet e lëkurës: Disa sëmundje të lëkurës, të tilla si ekzema dhe psoriaza, mund të shkaktojnë skuqje dhe kruajtje në zonën gjenitale.
3. Infeksionet maja: Maja është një kërpudhë që ndodh natyrshëm dhe është normalisht e pranishme në vaginë. Zakonisht nuk shkakton probleme, por kur rritja e saj është e pakontrolluar, mund të rezultojë një infeksion i pakëndshëm.
4. Vaginoza bakteriale: Shkaktohet nga një çekuilibër midis baktereve të mira dhe të këqija që ndodhen natyrshëm në vaginë.
5. Sëmundje seksualisht të transmetueshme: SST-të transmetohen gjatë marrëdhënieve seksuale të pambrojtura dhe shkaktojnë kruajtje në vaginë, duke përfshirë: klamidia, lythat gjenitalë, gonorrhea, herpes gjenital etj.
6. Menopauza: Ndodh për shkak të zvogëlimit të niveleve të estrogjenit që ndodhin gjatë menopauzës, që çon në atrofi të vaginës.
7. Stresi: Stresi fizik dhe emocional mund të shkaktojë kruajtje dhe acarim të vaginës, megjithëse kjo nuk është shumë e zakonshme. Mund të ndodhë kur stresi dobëson sistemin imunitar, duke ju lënë më të predispozuara ndaj infeksioneve që shkaktojnë kruajtje.
8. Kanceri i vulvës: Në raste shumë të rralla, kruajtja vaginale mund të jetë një simptomë e kancerit. Ky është një lloj kanceri që zhvillohet në vulvë, pjesa e jashtme e organeve gjenitale të femrave.
Kur të konsultoheni me specialistët?
Nëse kruajtja është shumë e fortë dhe shkakton parehati në përditshmëri ose gjatë gjumit, nevojitet konsultë mjekësore. Gjithashtu duhet të vizitoheni nëse kruajtja zgjat më shumë se një javë dhe shoqërohet me simptoma të tjera, si:
- flluska në vulvë
- dhimbje ose ndjeshmëri në zonën gjenitale
- skuqje ose ënjtje gjenitale
- probleme me urinimin
- sekrecione të pazakonta
- siklet gjatë marrëdhënieve seksuale
