111 persona vdiqën në aksidente trafiku në vitin 2021, BKS pagoi mbi 10 milionë euro dëme

Aktuale

111 persona vdiqën në aksidente trafiku në vitin 2021, BKS pagoi mbi 10 milionë euro dëme

Më: 20 janar 2022 Në ora: 13:57
Konferenca e tetë vjetore ndërkombëtare “Mobiliteti i mençur – e ardhmja e transportit të gjelbër dhe të qëndrueshëm”

Në ambientet e Byrosë Kosovare të Sigurimeve po mbahet Konferenca e tetë vjetore ndërkombëtare “Mobiliteti i mençur – e ardhmja e transportit të gjelbër dhe të qëndrueshëm”, e cila ka të bëjë për rregullimin e infrastrukturës rrugore.

Drejtori i Divizionit të Trafikut nga Policia e Kosovës, nënkolonel Jeton Rexhepi, tha se numri i aksidenteve rrugore me fatalitet viteve të fundit është shqetësues.

Ai përmendi se vetëm vitin e kaluar në rrugët e Kosovës kanë humbur jetën 111 persona.

“Kanë qenë 111 persona të vdekur, 46 ose 41.4 për qind kanë qenë shoferë, ku prej tyre kanë qenë pesë çiklistë, dy motoçiklistë dhe dy traktoristë, 35 apo 31.5 për qind pasagjerë dhe 30 apo 27 për qind kanë qenë këmbësorë", ka thënë ai.

Rexhepi ka folur edhe rreth planeve që ka Policia e Kosovës për vitin 2022 lidhur me parandalimin e aksidenteve, siç janë radarët mobil, lëshimi në mënyrë elektronike të gjobave.

Susanna Zammataro, drejtoreshë e përgjithshme e Federatës Ndërkombëtare të Rrugëve në Zvicër, tha se si organizatë janë duke punuar për rregullimin e infrastrukturës, e cila do të ulë numrin e aksidenteve me fatalitet.

"Ne bëjmë mbledhjen e të dhënave dhe të gjitha këto detaje sa i përket sigurisë. Statistikat i kemi për 64 vende dhe të dhënat përdoren nga organizata të ndryshme. Shtylla e aktiviteteve është siguria në rrugë," ka thënë ajo.

Drejtori i Byrosë Kosovare të Sigurimit, Sami Mazreku tha se dëmet si pasojë e aksidenteve po u shkaktojnë dëme të mëdha. Ai shtoi se në bashkëpunim me Kolegjin Tempulli dhe Policinë e Kosovës këtë vit do të organizojnë kampanja të shumta për parandalimin e aksidenteve. 

"Numri i tiketave që shohim në trafik po shkon në rritje. BKS ka paguar 10.2 milionë euro dëme. Policia e Kosovës aktualisht nuk ka pajisje që i vëren në teren automjetet për regjistrim. Vitin 2022 kemi në plan shumë kampanja dhe aktivitete. Ka nevojë për ndryshime Ligjore që Policia e Kosovës përveç gjobës të ketë të drejtë edhe ta largoj veturën nga trafiku nëse s’ka regjistrim. Nëse edhe një jetë arrijmë ta shpëtojmë për ne është fitore e madhe”, ka thënë ai.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat