Ttë raste të dhunës në familje, janë raportuar vetëm brenda 24 orëve. Dy raste të dhunës janë raportuar në Prishtinë. Sipas raportit të Policisë, në Prishtinë është arrestuar një i dyshuar mashkull, për shkak se kishte ushtruar dhunë fizike ndaj ish-bashkëshortes së tij. Viktima ka pranuar tretman mjekësor. Ndërsa i dyshuari me vendim të prokurorit është dërguar në mbajtje.
Ndërkaq po ashtu në Prishtinë është raportuar dhe një rast tjetër i dhunës. Por kësaj radhe viktimë ka qenë një mashkull, i cili ka njoftuar policinë se është sulmuar fizikisht nga bashkëshortja e tij. Viktima ka pranuar tretman mjekësor, ndërsa me vendim të prokurorit rasti shkon në procedurë të rregullt.
E viktimë e dhunës në familje, ka qenë dhe një femër në Fushë Kosovë, e cila ka njoftuar policinë se është sulmuar fizikisht nga bashkëshorti i saj. Viktima ka pranuar tretman mjekësor, ndërsa i dyshuari është arrestuar.
Edhe në Istog, është arrestuar një person, për shkak se kishte ushtruar dhunë fizike ndaj bashkëshortes së tij. I dyshuari me vendim të prokurorit, është dërguar në mbajtje.
E në Prizren është arrestuar një grua, pasi që kishte ushtruar dhunë ndaj djalit të saj 13 vjeçar. E dyshuara pas intervistimit me vendim të prokurorit është dërguar në mbajtje.
Ndërkaq një rast tjetër i dhunës është shënuar dhe në Suharekë, ku një person është arrestuar pasi që në gjendje të dehur kishte ushtruar dhunë ndaj nënës dhe bashkëshortes së tij. I dyshuari me vendim të prokurorit është dërguar në mbajtje.
Një rast i dhunës në familje është shënuar dhe në Pejë. Sipas raportit të policisë, është arrestuar një burrë, i cili kishte ushtruar dhunë fizike ndaj bashkëshortes. Viktima është dërguar për trajtim mjekësor, ndërsa i dyshuari pas intervistimit me vendim të prokurorit është dërguar në mbajtje.
Ndërsa dhe në Gjakovë, është arrestuar i dyshuari mashkull kosovar, nën dyshimin se ka ushtruar dhunë psiqike ndaj bashkëshortes së tij. Viktimës iu është ofruar tretman mjekësor dhe e njëjta pas tretmanit mjekësor ka shkuar tek vëllai i saj. Po ashtu janë proceduar shkresat për urdhër mbrojtës. Në lidhje me rastin është konsultuar prokurori i shtetit, i cili ka rekomanduar që i dyshuari pas intervistimit të lirohet dhe rasti të procedohet në procedurë të rregullt.
