Një person i dënuar më parë për pengmarrje dhe tentativë vrasjeje është arrestuar nga Policia e Tiranës teka qarkullonte me një Audi të blinduar dhe pistoletë në brez. Ai quhet Roland Domi, 44 vjeç, banues në Tiranë. Bashkë me të u arrestua dhe Almir Ismaili, një 41-vjeçar nga Tirana.
Arrestimi i tyre u bë nga specialistët e Komisariatit të Policisë Nr. 6, në bashkëpunim me Forcën e Posaçme Operacionale në Drejtorinë Vendore të Policisë Tiranë në kuadrin e operacionit "Revolverët".
Policia tha se Roland Domi rezultonte i dënuar më parë për “Heqje e paligjshme e lirisë” dhe “Vrasje në bashkëpunim e mbetur në tentativë”. Në bazë të informacioneve që këta shtetas lëvznin me armë zjarri me vete është bërë organizimi i shërbimeve dhe ndalimi i tyre, të cilët lëviznin me një automjet të markës Audi A8 (i blinduar).
Nga kontrolli i ushtruar këtyre shtetasve i janë gjetur dhe sekuestruar në cilësinë e provës materiale:
Një armë zjarri, pistoletë e markës SMITH & WESSON dhe një armë zjarri, pistoletë TT.
Akuzat mbi të dy janë: "Prodhimi dhe mbajtja pa leje e armëve luftarake dhe e municionit".