Ne ishim bashkë kur dita vinte
Ishim prapë bashkë, kur nata nxinte.
Kaluan ditë, muaj dhe vite
Jeta na ndau, ti humbe, ike.
Më humbe, ike me lot pa fjalë
Më mbeti mua loti n’qepallë
Prush i pashuar mbuluar n’hi
Mall prej sa kohe mbajtur n’gji.
Kishte shumë kohë s’të kisha parë
Po sa të pashë më ndeze mall
Dhe sytë u njomën, u mbushën lot
S’munda t’flas gjë, s’fole gjë dot.
Kafshoje buzën matanë përball
Po sa të pashë më ndeze mall,
Fill sa u shfaqe si yll mengjesi
Mall i pashuar në mua ndezi.