Vjersha e dytë për atdheun

Kultura

Vjersha e dytë për atdheun

Nga: Agron Shabani Më: 21 qershor 2022 Në ora: 21:46
Agron Shabani

Atdheu
nuk është sall dhembje e mall
që e bart me plaçkat poshtë e lart planetit
Nuk është sall plagë
që e merr me vete kur nisesh
Atdheu është edhe qortim
qortim i rëndë
sa herë ia kthen shpinën

Atdheu është i durueshëm
edhe pas njëqind vjetësh
edhe pas njëmijë motesh
mund të shkruash vjershën për të
nuk je i tepërt
nuk je i vonuar

Ç'është Atdheu?

Ai që më vjen çdo të dytën natë
tek dritarja në Bahnstrasse 14
në Aveny 68 Road 9
në Menhatan
në Champion Forest dr.
e kudo që gjendem
e unë
Unë nuk mund t'i shkoj asnjëherë

Atdheu
është zgjim i cemtë i vetmuar i huaj
kur shikon këmbët e tua prej plumbi
që nuk mund ta kalojnë Urën e Qabesë

Atdheu është edhe Druri
nga rruga ku je rritur
është ylberi dhe përroi
ku e ke takuar për herë të parë
ujin dhe gurin
është qielli blu
të cilin e ke pritur të hapet
Natën e Madhe

Atdheu është gjithnjë
pendim i madh
vrasje në ndërgjegje.

1992

P.S. Biografi e shkurtër për Agim Malën:

Agim Mala u lind në Gjakovë më 17 tetor 1951, ku kreu shkollën fillore dhe gjimnazin. Diplomoi në Fakultetin e Mjekësisë në Universitetin e Prishtinë, ku për një kohë studioi edhe gjuhën angleze. Me krijimtari letrare u paraqit në fillim të vjetëve ’70. Ka punuar gazetar e redaktor në gazetën e studentëve të Kosovës “Bota e re” (1976 - 1978), në të përjavshmen “Zëri i rinisë” (1978 - 1981) dhe në revistën “Fjala" etj.

Kurse një kohë qe drejtor i Radio Televizionit të Prishtinës (1987 - 1990).

Nga viti 1990 Agim Mala jetoi në mërgim, në fillim në SHBA dhe në Kroaci, pastaj në Zvicër.

 Në vitin 1993 ka nisur të organizojë botimin e shtypit shqiptar të Kosovës në Europë, duke qenë bashkëbotues ose botues i disa titujve: “Eurozëri” (1993 - ), “Bota sot” (1995 - ), “Java shqiptare” (1998 - ) dhe “Zëri ditor” (1999 - ).

Ka botuar librat me poezi: “Fjalë e vetmi”, “Rilindja”, Prishtinë, 1978; “Dritarja që s’hapet”, “Rilindja”, Prishtinë, 1981; “Pamjet pa ne”, “Rilindja”, Prishtinë, 1984; “Gjak në ëndërr”, “Rilindja”, Prishtinë, 1990. Librin me tregime: “Kortezhi i lagur”, “Rilindja”, Prishtinë, 1987. Dramat: “Ventrusët”, “Jeta e re”, Prishtinë, 1986 dhe “Teatri obskur”, “Jehona” Shkup, 1990(?). Poezitë e tij janë përkthyer në sllovenisht, hungarisht, turqisht, rumanisht, anglisht, suedisht, kurse në gjuhën serbokroate i është botuar libri “Shtëpia në savanë”, “Jedinstvo”, Prishtinë & ”Svetlost”, Sarajevë, 1985.
Vdiq më 2 tetor 2007 në Bern dhe u varros më 5 tetor 2007 në Luzern të Zvicrës.

 

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat