David Binder korrespodenti i gazetës prestigjioze amerikane The New York Times, ka ndërruar jetë në moshën 88 vjeçare të dielën e javës që shkoi. Ai kishte punuar për një kohë të gjatë në NYT duke mbuluar disa luftëra të ndryshme.Duke filluar nga Lufta e Ftohtë e deri tek luftërat në Bosnje, Kroaci dhe Kosovë.
Gruaja e Binder, Helga, ka thënë se shkak për vdekjen e tij, ka qenë një sëmundje e veshkave e cila kishte mbërritur në stadin e fundit të zhvillimit, shkruan NYT.
Gazeta amerikane e përkujton Binderin si një gazetar i cili asnjëherë nuk kishte pushuar së punuari, dhe që kishte mbuluar me raportimet e tij, ngjarje të cilat kanë ndryshuar shumëçka.
Duke nisur nga ndërtimi i Murit të Berlinit në vitin 1961, rrëzimin e tij në vitin 1989, pastaj raportimet mbi tensionet të shumta në Lindje e Perëndim nën regjimet komuniste në Gjermaninë Lindore, Poloni, Çekosllovaki, Hungari, Rumania, Bullgaria e duke përfunduar tek luftërat në Jugosllavi.
Në fillim të viteve 90-ta, siç shkruan NYT, Binder pas vendosjes së paqes në Gjermani, kishte vendosur të kthehet në Ballkan për të mbuluar luftërat që kishin përfshirë ish-Jugosllavinë, masakrat, përdhunimet masive dhe gjenocidin, vrasjen e mbi 100 mijë njerëzve dhe dëbimin e miliona civilëve nga shtëpitë e tyre.
Binder kishte intervistuar viktima civile të luftës, luftëtarë e drejtues të luftërave, përfshirë edhe kriminelët serbë të akuzuar për krime lufte, Sllobodan Millosheviq e Ratko Mlladiq.
Gazeta amerikane kujton se Sllobodan Millosheviq si ish-president i Serbisë kishte vdekur në burg në vitin 2006, ndërsa Ratko Mmladiq ishte dënuar me burgim të përjetshëm në vitin 2017 për krime kundër njerëzimit dhe gjenocid, nga Gjykata Ndërkombëtare e Hagës.