Presidenti i Serbisë, Aleksandar Vuçiq është takuar në Beograd me presidenten e Kroacisë, Kolinda Grabar Kitaroviq.
Ajo ka udhëtuar në Beograd si e ftuar në inaugurimin e presidentit të ri serb, Aleksandar Vuçiq.
Vuçiq dhe Grabar Kitaroviq kanë biseduar në katër sy, kurse presidenti i Serbisë ka thënë se beson se marrëdheniet ndërmjet dy shteteve dhe dy popujve do të përmirësohen deri në fund të vitit.
Vuçiq u ka thënë gazetarëve se me presidenten kroate ka biseduar për problemet konkrete dhe se është shumë i kënaqur me takimin.
Ndërkaq ajo që ka rënë më së shumti në sy ka qenë veshja e presidentes kroate. E para e shtetit kroat është shfaqur në Beograd e veshur kuqezi. Nuk dihet nëse kjo është bërë qëllimisht apo presidentja kroate thjesht është ndjerë mirë me atë veshje.
Të kujtojmë se presidentja kroate vitin e kaluar ka qenë pjesëmarrëse edhe në inaugurimin e presidentit të Kosovës, Hashim Thaçi.
Marrëdhëniet e Serbisë dhe Kroacisë janë në pikën më të ulët, pasi që të dy shtetet janë në një garë të armatimit dhe marrjes së primatit në Ballkanin Perëndimor.
