Lumir e gëzofsh detyrën e kryetarit të LDK-së dhe të uroj suksese në punën e detyrën tuaj për ndryshimin dhe vënien në funksionim të LDK-së si një alternativë pse jo edhe e re, duke ruajtur vlerat dhe trashëgiminë e vyer të Rugovës si dhe në evoluimin demokratik e politik të saj në kushtet e reja në të cilat përballet sot Kosova.
Suksese LDK-së që pritet të rinovohet e të drejtohet tashmë nga Ju në drejtim të forcimit e konsolidimit të shtetit ligjor dhe të sistemit demokratik, aktualisht si një opozitë politike (pas Mustafa) konstruktive që do të kontribuojë për funksionimin e drejtësisë dhe të shtetit ligjor; për çmontimin e krimit e korrupsionit nga sistemi dhe për plotësimin e standardeve demokratike, për integrimin dhe anëtarësimin e Kosovës në BE dhe në strukturat e organizmat ndërkombëtare, pasi opozita ashtu si pozita janë komponentë njësoj të rëndësishëm për sistemin demokratik.
Z. Abdixhiku po të drejtohem për kujtesë që të bësh e të veprosh ndryshe pasi duhet të bëhet ndryshim dhe kthesë.
Këtë po ta them me këtë shkrim, por këtë ta thanë dhe ta kërkon edhe verdikti dhe legjitimiteti popullor i zgjedhjeve të 14 Shkurtit 2021, referendum i cili ndëshkoi me meritë politikën e vjetër dështake, antipublike e antikombëtare të koalicionit të së keqes ku pjesë e saj ishte edhe vetë LDK-ja e drejtuar nga Isa Mustafa.
Nëse populli e ndëshkoi me votë politikën e vjetër LDK, PDK e AAK, tashmë anëtarësia e LDK-së pret prej teje ndëshkimin, VETING-un dhe çlirimin e LDK-së prej uzurpatorëve të saj, se nuk mjafton vetëm largimi formal i Isa Mustafës por duhet të largohet e tërë struktura subjektiviste e personalizuar, emëruar dhe privatizuar tij e cila i ka rrënjët akoma të fuqishme në LDK.
Lumir, duhet bërë ndryshim dhe kthesë që të ngjallet shpresë te ata që akoma votojnë e besojnë te LDK-ja dhe te ata të tjerët që janë larguar prej saj se: nëse LDK-ja ndryshon e bën kthesë ata do të ktheheshin përsëri në LDK.
Lumir, duhet të ndahesh nga e kaluara; duhet të dalësh e t’i kërkosh falje anëtarësisë dhe publikut për ortakërinë e LDK-së në krim, hajni, korrupsion e tradhti në aleancë me PDK e AAK e të tjerë pasi kundrejt tyre LDK ka edhe një fizionomi tjetër politike; duhet t’u kërkosh e të bësh kritikë për pa sinqeritetin dhe mashtrimin që i është bërë elektoratit të djathtë, për matrapazllëqet me politikën tjetër të pushtetit që e sunduan dhe e keqqeverisën Kosovën në këto 20 vite; duhet kërkuar “falje” duke ndryshuar e premtuar ndryshimin real para elektoratit të djathtë; duhet kërkuar falje për manipulimin ,mashtrimin dhe për spekulimin me rugovizmin dhe shfrytëzimin e tij për interesa të ngushta personale që ka bërë elita e vjetër e LDK-së prej së cilës edhe u ndëshkua ashpër LDK-ja me 14 Shkurt 2021; duhet kritikë e besueshme dhe kërkim falje publike në emër të LDK-së për Marrëveshjen për Bashkësinë e Komunave serbe, për Demarkacionin me Maqedoninë e Malin e Zi dhe për fantazmën e idesë antishqiptare të copëtimit të Kosovës.
Pra z. Abdixhiku, të ka ra hisja që t’i ndërmarrësh këto veprime në emër të LDK-së tani, dhe madje edhe i duhet kërkuar edhe Znj. Osmani dhe Znj. Gërvalla falje pasi ato kanë qenë opozitaret dhe kundërshtaret e fuqishme kundër këtyre veprimeve të LDK-së të cilat i citova më lart dhe që për të cilat strukturat e larta të LDK-së i shkarkuan ato nga postet e larta partiake e që ia imponuan atyre largimin nga LDK-ja.
Është koha që karshi Vjosës të kërkohet “pendesë” për atë se çfarë pandershmërisht dhe heretikisht LDK-ja e Isa Mustafës vepruan kundër saj.
Vjosa nuk është larguar nga LDK-ja me dëshirë, ajo as nuk ka devijuar nga filozofia rugoviane e LDK-së, dhe ajo as kurrë nuk e ka tradhtuar elektoratin dhe e as premtimet e saj për luftë për ta çrrënjosur padrejtësinë, korrupsionin, krimin, hajninë dhe tradhtinë nga sistemi.
Dhe prandaj z. Abdixhiku dhe ju deputetët e LDK-së duhet ta votoni Vjosën për Presidente sepse tashmë ajo është personi më i votuar në Kosovë jo vetëm nga anëtarësia e LDK-së por edhe nga votuesit kosovarë pa marrë parasysh se ku aderojnë dhe kë parti politike simpatizojnë ata.
Anëtarësia e LDK-së nuk pret prej jush vetëm ndërrimin apo zëvendësimin e Isa Mustafës, por pret reformimin e LDK-së.
