Posti i kryeministrit “mollë sherri” për LDK-në dhe VV-në - Bota Sot
Posti i kryeministrit “mollë sherri” për LDK-në dhe VV-në

Politika

Posti i kryeministrit “mollë sherri” për LDK-në dhe VV-në

Nesib Hoti Nga Nesib Hoti Më 10 korrik 2019 Në ora: 20:00
Albin Kurti dhe Isa Mustafa

“Këto janë spekulime mediale, nuk është diskutuar asnjëherë kjo temë në forumet e partisë, vlerësoj se si partia më e madhe kryeministri duhet dhe do të jetë nga LDK-ja”, është shprehur Naser Rugova i LDK-së.

U raportua se lideri i LDK-së, Isa Mustafa e ka ndërmend t’i harrojë të gjitha sulmet e Lëvizjes Vetëvendosje dhe që Albin Kurtit t’ia falë postin e kryeministrit, madje, u shkua aq larg, sa që kjo parti u tha se po synon ta marr postin e presidentit.

Mirëpo, një gjë e tillë nga Lidhja Demokratike e Kosovës u demantua menjëherë. Ata bëjnë me dije se partia e tyre nuk heq dorë nga kryeministri edhe në rast të koalicioneve parazgjedhore.

Nga partia e Isa Mustafës për gazetën “Bota sot”, kanë deklaruar se raportimet e fundit janë vetëm spekulime, pasi sipas tyre një gjë e tillë edhe me tej nuk është diskutuar në forumet e partisë. Për këtë parti kryeministri duhet dhe do të jetë nga partia e tyre.

Ndërsa, nga partia e Albin Kurtit, përkundër tentimeve të shumta nga gazeta “Bota sot”, ata nuk kanë dashur të flasin për një temë të tillë. Përderisa, kanë konfirmuar se një gjë e tillë nuk është diskutuar as në partinë e tyre.

Nga ana tjetër, njohësit e kësaj fushe, vlerësojnë se për të rrezuar koalicionin PAN, duhet që gjithsecili të sakrifikojë diçka nga vetja.

Rugova: Kryeministri duhet dhe do të jetë nga LDK-ja

Deputeti i Kuvendit të Kosovës, nga radhët e Lidhjes Demokratike të Kosovës, Naser Rugova, për gazetën “Bota sot”, ka thënë se raportimet e fundit se LDK ka hequr dorë nga kryeministri janë vetëm spekulime mediale, pasi ai konfirmon se një gjë e tillë nuk është diskutuar asnjëherë kjo temë në forumet e partisë.

Rugova potencon se kryeministri duhet dhe do të jetë nga Lidhja Demokratike e Kosovës.

Image
Naser Rugova

“Këto janë spekulime mediale, nuk është diskutuar asnjëherë kjo temë në forumet e partisë, vlerësoj se si partia më e madhe kryeministri duhet dhe do të jetë nga LDK-ja”, është shprehur Rugova i LDK-së.

Mes tjerash deputeti i opozitës ka theksuar se pritjet e qytetarëve janë se partia e tij duhet t’i të marr përgjegjësitë kushtetuese dhe të fillojë t’i heqë nga rendi i ditës të gjitha temat që aktualisht ky koalicion qeverisës nuk ka kapacitete t’i përmbyllë.

“Kështu janë edhe pritjet e qytetarëve në mënyrë që kryeministri nga LDK-ja të marr përgjegjësitë kushtetuese dhe të fillojë t’i heqë nga rendi i ditës të gjitha temat që aktualisht ky koalicion qeverisës nuk ka kapacitete t’i përmbyllë dhe të fillojë etapë e re e qeverisjes normale që kthen shpresën dhe hape perspektivë të re për vendin tonë”, ka përfunduar deputeti i Kuvendit të Kosovës, nga radhët e Lidhjes Demokratike të Kosovës, Naser Rugova, për gazetën “Bota sot”.

Mehmeti: Gjithsecili të sakrifikojë diçka nga vetja

Ndërsa, nga ana tjetër, analisti dhe njohësi i zhvillimeve politike në vend, Faton Mehmeti, në një prononcim për gazetën “Bota sot”, ka deklaruar se për ta rrëzuar PAN-in duhet që gjithsecili të sakrifikojë diçka nga vetja.

Madje, analisti politik konsideron se nëse partia e Mustafës heq dorë nga posti i kryeministrit për ta rrëzuar këtë qeveri nga pushteti, kjo duhet përshëndetur.

Image
Faton Mehmeti

“Për të rrezuar këtë të keqe që e ka kapluar vendin, duhet që gjithsecili të sakrifikojë diçka nga vetja. Nëse LDK heq dorë nga posti i kryeministrit për ta rrëzuar këtë qeveri nga pushteti, kjo duhet përshëndetur”, ka thënë Mehmeti.

Sipas tij, një gatishmëri e tillë e LDK-së hap rrugë që e keqja të largohet përfundimisht.

“Kjo tregon kurajo dhe gatishmëri për t'i hap rrugë që e keqja të largohet, me shpresën se ditë të mira do të vijnë për vendin”, tha mes të tjerave ai.

Ai gjithashtu shprehet se nëse ndodhë në realitet një koalicion i tillë mes këtyre partive, atëherë fitorja është e garantuar.

“Nëse bëhet bashkë një koalicion LDK-VV me këtë të dytën për kryeministër atëherë fitorja është e garantuar. Kjo do të jepte pikë shumë LDK-së si parti që nuk vrapon pas posteve por shikon në rend të parë interesin e qytetarëve dhe Kosovës”, ka përfunduar analisti Mehmeti, për gazetën “Bota sot”.

Krasniqi: Të sigurohen votat për rrëzimin e Qeverisë Haradinaj

Edhe politologu Faik Krasniqi është në një linjë me analistin Faton Mehmeti.

Krasniqi për gazetën “Bota sot”, ka thënë se një koalicion pas zgjedhor mes LDK-së dhe VV-së, do të ishte varianti më i mirë për të dal nga kjo gjendje e mjerueshme.

Image
Faik Krasniqi

“Së pari duhet të sigurohen votat për rrëzimin e Qeverisë. Pas zgjedhjeve ajo parti që del e para, ka të drejtën edhe formimin e Qeverisë. Një koalicion LDK-VV, pas zgjedhjeve, do të ishte varianti më i mirë për të dal nga kjo gjendje e mjerueshme që e ka kapluar vendin tonë”, ka thënë politologu.

Ai konsideron se parti e Mustafës do të dëmtohej nëse bënë përsëri koalicion me partinë e Veselit, madje, potencon se një gjë e tillë do ishte edhe goditje e madhe për Kosovën, por edhe për vet LDK-në.

“LDK do të dëmtohej nëse bënë përsëri koalicion me PDK-në, por jo edhe me VV-në. Nëse ndodhë që LDK bënë prapë koalicion me PDK-në, atëherë ky vend do të fundoset përfundimisht. Do të ishte goditje e madhe për Kosovën, por edhe vet për LDK-në”, konsideron Krasniqi.

Ndërsa, në fund, ka theksuar se posti i kryeministrit nuk guxon të jetë mollë sherri mes LDK-së dhe VV-së.

“Prandaj, posti i kryeministrit nuk guxon të jetë mollë sherri mes LDK-së dhe VV-së për një koalicion qeverisës mes këtyre dy partive, sepse këto dy parti janë shpresa e vetme e qytetarëve të Kosovës. Nëse do pyetesha unë, në këtë koalicion Albin Kurti do të duhej të ishte kryeministër”, ka përfunduar Faik Krasniqi.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...