Zbulimi i marrëveshjes sekrete të Thaçit, nga kryeministri Albin Kurti, më 2013, si ish-kryeministër i Kosovës, me Sekretarin e përgjithshëm të atëhershëm të KFORIT, Anders Fogh Rasmussen, për veton që mos t'i lejohet lëvizja e hyrja e FSK-se në Veri të Kosovës, nuk mund të quhet asgjë më shumë se sa një tradhti shtetërore dhe përgjegjësi shumë e madhe nga Hashim Thaçi.
Kështu ka vlerësuar njohësi i çështjeve politike, profesor Sulejman Mehazi i cili në një prononcim për gazetën “Bota sot” ka thënë se kjo marrëveshje zbuloi dhe diç më shumë rreth asaj, se ja përse presidenti i Kosovës Hashim Thaçi, këmbëngulë për çështjen e shkëmbimit të territoreve me Serbinë, pasi ai që në vitin 2013,vec ia paska shitur një pjesë të territorit, të Kosovës, Serbisë.
“Ja pse gjatë dialogut me Serbinë Thaçi është i përshtatshëm për Vuçiqin. Thaçi duhet të jep dorëheqje të parevokueshme dhe akuzuar rënde për këto veprime kundër kushtetuese. Këtë marrëveshje tinëzare mund ta krahasojmë me Shën Naumin e shitur Jugosllavisë nga Ahmed Zogu, atë që bëri Ahmet Zogu me Shën Naumin e ka bërë edhe Thaçi me Veriun e Kosovës. Nëse na lejohet t'ia bëjmë një pyetje Presidentit të Kosovës, Hashim Thaçit, se kjo marrëveshje e tij me Rasmussenin a s'është tradhti shtetërore, dhe se a duhet dënuar ai, apo jo? Thaçi kushedi sa t'ia fshehi brirët dashit, prap do ti dalin në mejdan, sikurse juve që ju doli kjo marrëveshje e fshehur për të kënaqur Serbinë, e për të dëmtuar rëndë Kosovën”, ka thënë njohësi i çështjeve politike profesor Sulejman Mehazi.