Kërkesa e Vjosa Osmanit për rrëzimin e dekretit të Thaçit, vjen thirrja: Në vend të kërcënimeve ndaj saj, të gjithë ta mbrojnë Kushtetutën - Bota Sot
Kërkesa e Vjosa Osmanit për rrëzimin e dekretit të Thaçit, vjen thirrja: Në vend të kërcënimeve ndaj saj, të gjithë ta mbrojnë Kushtetutën

Politika

Kërkesa e Vjosa Osmanit për rrëzimin e dekretit të Thaçit, vjen thirrja: Në vend të kërcënimeve ndaj saj, të gjithë ta mbrojnë Kushtetutën

Nga: G.B Më: 15 maj 2020 Në ora: 08:22
Vjosa Osmani dhe Isa Mustafa

Kryetarja e Kuvendit, Vjosa Osmani, ka kërkuar që Gjykata Kushtetuese ta rrëzojë dekretin e Presidentit për formimin e qeverisë së re, në komentet që i ka dërguar gjykatës.

Ky është një qëndrim i kundërt me partinë të cilës i përket, derisa LDK dëshiron që të formojë qeverinë Hoti, në koalicion me AAK-në, Nismën dhe Listën Serbe.

E kryetari i LDK-së, Isa Mustafa, ka paralajmëruar masa ndaj Osmanit, lidhur me qëndrimet e saj.

Image
Sami Blakaj

Lidhur me këtë, njohësi i çështjeve politike, Sami Blakaj, ka thënë për gazetën "Bota sot" se kryetarja e Kuvendit e ka shfrytëzuar të drejtën e saj për të dërguar komente dhe se ajo nuk mbështetë parti por mbështetet në Kushtetutën e vendit.

"Kryetarja e Kuvendit të Kosovës, Vjosa Osmani ka shfrytëzuar të drejtën e saj për të dërguar komente lidhur me dekretin e presidentit për formimin e qeverisë dhe ky është një hap i duhur në kohën e duhur. Kërkesa e zonjës Osmani për rrëzimin e dekretit të presidentit nuk është kërkesë e mbështetur në mbrojtjen e interesave personale apo partiake, por është kërkesë e mbështetur në aktin më të lartë juridik, e që në këtë rast është Kushtetuta e vendit", është shprehur ai.

Sipas tij, mbrojtjen e Kushtetutës e kanë obligim të gjithë, duke shtuar se kolegët e Vjosës brenda dhe jashtë LDK-së, në vend të kërcënimeve ndaj saj, duhet bashkuar që të punojnë bashkë në mbrojtjen e ligjshmërisë dhe kushtetutshmërisë në vend.

"Mbrojtja e Kushtetutës nuk është vetëm detyrë e gjykatës kushtetuese, por është më shumë një detyrim që u drejtohet politikanëve, ligjvënësit, gjyqësorit, si edhe shtetasve në përgjithësi. Në këtë kuptim edhe kolegët e zonjës Osmani, qoftë brenda LDK-së, por edhe jashtë saj, në vend të kritikës dhe kërcënimeve ndaj Vjosës, do duhej bashkangjitur asaj dhe së bashku të punojnë në mbrojtjen e ligjshmërisë dhe kushtetutshmërisë në vend. Fundja, ky është obligim ligjor, politik e moral që përfaqësuesit politik domosdoshmërish duhet ta përmbushin fillimisht para vetës, pastaj familjes dhe bashkëqytetarëve të tyre", ka deklaruar Sami Blakaj për "Bota sot".

Shfaq komentet
comments powered by Disqus
Sot mund të lexoni Shfletoni kopertinat