Drejtori për Evropën i Organizatës Botërore të Shëndetësisë ka shprehur shqetësimin se vera mund të përshpejtojë përhapjen e shpërthimit të fundit të lisë së majmunëve. Dr Hans Kluge tha në një deklaratë të premten se me verën që vjen bashkë me mbledhje masive, festivale dhe festa, rritet shqetësimi se transmetimi mund të përshpejtohet.
“Rastet që po zbulohen aktualisht janë ndër ato që transmetohen me aktivitet seksual”, shtoi ai.
CDC gjithashtu vuri në dukje të mërkurën se shumë raste në shpërthimin aktual "po ndodhin brenda rrjeteve seksuale" (lexo më shumë).
Lija e majmunëve është endemike në Afrikën qendrore dhe perëndimore, ku zakonisht transmetohet nëpërmjet gërvishtjeve ose kafshimeve nga kafshët e egra, por është shumë e pazakontë në rajonet pa këto popullata kafshësh, si Evropa dhe SHBA. Shfaqja e rasteve në 11 vende jashtë këtyre rajoneve ka ngjallur shqetësim në mesin e shkencëtarëve që përpiqen të kuptojnë përhapjen e papritur.
“Më lejoni të theksoj se shumica e rasteve aktualisht nën hetim në Evropë janë deri më tani të lehta”, tha Kluge.
Ai u bëri thirrje punonjësve të kujdesit shëndetësor që të përdorin të njëjtat masa higjienike të vendosura për mbrojtjen nga COVID-19. Meqenëse simptomat e lisë së majmunëve janë të panjohura për shumë njerëz, Kluge gjithashtu u bëri thirrje njerëzve që të raportojnë çdo skuqje të pazakontë te mjeku i tyre.
Ndryshe nga COVID-19, lija e majmunëve përhapet rrallë tek njerëzit. Transmetimi mes njerëzve zakonisht ndodh nëpërmjet pikave të mëdha të frymëmarrjes që transmetohen përmes kontaktit të ngushtë fizik; ose nëpërmjet veshjeve apo shtratit të kontaminuar.
Vendet në të cilat janë konfirmuar raste me linë e majmunëve deri tani janë: SHBA, Britania e Madhe, Kanadaja, Australia, Belgjika, Franca, Gjermania, Italia, Portugalia, Spanja dhe Suedia, sipas deklaratës së Kluge.
