Policia bën me dije, se Polici Rrugor i ‘padukshëm’ ndodhet gjithmonë në rrugë për drejtuesit e mjeteve që nuk zbatojnë rregullat e qarkullimit.
Prezenca e tij është me anë të mjeteve logjistike bashkëkohore për ata që shkelin rregullat duke u kthyer në burim aksidenti.
Në aksin rrugor Lushnjë – Rrogozhinë radari i Policisë ka konstatuar automjetin tip “Benz” me shpejtësi ekstreme 193 km/h, si dhe po në këtë aks rrugor radari i fshehtë konstaton automjetin “Golf 5” me shpejtësi ekstreme 177 km/h, si dhe automjetin “Polo” me shpejtësi 152 km/h.
Për shkelësit e rregullave, masa e gjobës varion në 5.000 – 15.000 lekë, plus 1-3 muaj pezullimi i lejes së drejtimit për ata drejtues mjetesh që kanë mbi tre vjet që kanë marrë patentën, si dhe 3-6 muaj për ata fillestarët me patentë deri në tre vjet.
Po më kryesorja është rreziku për jetën, pasi shpejtësi të tilla dhe në kushtet e lagështirës në rrugë rrezikojnë seriozisht jetën e drejtuesit të mjetit, të pasagjerëve dhe të përdoruesve të tjerë të rrugës.
Policia e shtetit u bën thirrje drejtuesve të mjeteve të respektojnë rregullat e qarkullimit rrugor, “në radhë të parë për sigurinë e jetës suaj, të atyre që udhëtojnë me ju dhe të përdoruesve të tjetër të rrugës!”.
Policia Rrugore monitoron dhe kontrollon qarkullimin e automjeteve në rrugët urbane dhe interurbane. /atsh