Ligji për të drejtat dhe mbrojtjen e fëmijëve ndalon përdorimin e pautorizuar të imazhit të tyre në fushata elektorale. Por pavarësisht kësaj, partitë vijojnë të mos kursejnë fëmijët në fushatë apo takime të tjera publike. I tillë është edhe rasti i aktivistit, Besjan Pesha, fotografia e të cilit u përdor nga Partia Socialiste.
"Jam ndjerë i shokuar, edhe i habitur, shumë i zemëruar".
Të tillë ndjesi shkakton tek një prind përdorimi i fotografisë së të birit si imazh elektoral.
Në morinë e dhjetra fotove nga aktivitete të ndryshe, Partia Socialiste përdori edhe foton e djalit të aktivistit Besjan Pesha, në takimin për çeljen e fushatës elektorale në kryeqytet më 23 mars.
Besjan Pesha: Kjo foto është e shkrepur nga nëntori i 2015 dhe nuk kishte lidhje me asnjë aktivitet publik, ishte aktivitet i joni dhe jam i habitur sesi ka përfunduar aty.
Ligji për të drejtat dhe mbrojtjen e fëmijës në nenin 17 të tij ndalon përdorimin e paautorizuar të imazhit të fëmijëve.
Por pavarësisht kësaj, partitë vijojnë të mos kursejnë të vegjëlit në fushatë apo takime të tjera publike.
Besjan Pesha thotë se ka ndërmarë hapat e parë ligjorë.
Besjan Pesha: Hapi i parë që kam ndjekur është që i kam çuar një letër institucionit të Agjencisë për Mbrojtjen e të Drejtave të Fëmijëve. Hapi tjetër, jam duke përgatitur padinë së bashku me disa miqtë e mi avokatë dhe besoj nga java tjetër kur ata ta kenë gati, janë duke shqyrtuar të gjitha nenet dhe ligjet që janë shkelur.
Aktivisti u drejtohet me një apel prindërve.
Besjan Pesha: Jam duke e bërë këtë gjë jo vetëm për tim bir por jam duke e bërë për tu dhënë një mesazh të gjithë prindërve: Mos lejoni të përdorin fëmijët për fushatat elektorale.
