Një konferencë e fundit e Ilir Metës pas ngjarjeve të fundit në Shqipëri ku nuk kurseu kritikat as për komunitetin ndërkombëtar, bëri që të interpretohet si shfaqje kundër Shteteve të Bashkuara të Amerikës.
Madje, deklaratat e Metës u komentuan edhe nga mediat amerikane.
Në artikullin e “Fox News” thuhej se presidenti shqiptar ka drejtuar akuza edhe komunitetit ndërkombëtar, përfshi BE-në dhe SHBA-në, pasi u ka bërë thirrje diplomatëve të mos bëhen qesharakë e të mos luajnë me kushtetutën e Shqipërisë.
Megjithatë, në një ceremoni për emërtimin e rrugës Gjakovë-Tropojë në Qafë Morinë ku ishte i pranishëm edhe ai vet, Meta deklaroi se nuk ka forcë në botë e cila vë në diskutim aleancën shqiptaro-amerikane.
Ai tha se raportet e mes dy kombeve janë të thella dhe të pa rrezikuara pavarësisht nga intrigat që bëhen për të përçarë shqiptarët në emër të SHBA-së.
Meta: Nuk ka forcë në botë e cila vë në diskutim aleancën shqiptaro-amerikane
“Nuk ka forcë në botë e cila vë në diskutim aleancën shqiptaro-amerikane. U përpoq komunizmi për 50 vite të shuante çdo ndjenjë pro-amerikane, por ja që nuk ia arriti dot për shkak se historia e dy vendeve tona e dy kombeve tona është shumë e thellë dhe është e pa rrezikuar pavarësisht se intrigat asnjëherë nuk do të përfundojnë për t’i përçarë shqiptarët ne emër të gjoja të Shteteve të Bashkuara të Amerikës”, deklaroi Meta.
