Vala e arrestimeve ndaj ish drejtuesve të lartë të Autoritetit Rrugor shqiptar duket se nuk do të ndalojë me burgosjen e Dashamir Xhikës.
Mësohet se policia ka arrestuar këtë të dielë një tjetër drejtues të ARRSH-së, shtetasin Albens Alite si dhe Ish-drejtori i njësisë së menaxhimit të rrugës Tiranë-Elbasan, Aksel Qorduka.
Personat në fjalë kanë mbajtur poste të larta në ARRSH dhe vendimi për arrestimin e tyre vjen në një moment kur Gjykata ka vendosur masën e arrestit me burg për ish drejtuesin Dashamir Xhika si dhe një sërë ish përfaqësuesish të institucionit.
Bëhet me dije se sërish, fletë-arrestet për dy ish drejtuesit Alite e Qorduka kanë të bëjnë me akuzën e shpërdorimit të detyrës dhe korrupsionit për aksin rrugor Tiranë- Elbasan.
Kujtojmë se ka qenë Ministri i Energjisë dhe Infrastrukturës Damian Gjiknuri, i cili ka kallëzuar penalisht në fund të vitit të kaluar Dashamir Xhikën, Albens Aliten dhe Aksel Qordukën.
Kallëzimi penal i depozituar në Prokurori nga ana e Gjiknurit u bë ndaj shtetasve:
1. Dashamir Xhika, ish Drejtor ish-Drejtor i Përgjithshëm i Autoritetit Rrugor Shqiptar, Tiranë.
2. Aksel Qurduka, ish-Drejtor i Njësisë së Menaxhimit të Projektit të rrugës Tiranë-Elbasan.
3. Albens Alite, Drejtor i Njësisë së Menaxhimit të Projektit të Rrugës Tiranë-Elbasan, pranë Autoritetit Rrugor Shqiptar, Tiranë.
