“Është gabimi im, informacioni që e dhashë se 19-vjeçarja është në mesin e viktimave nga COVID-19 në Spitalin e Tetovës. E kam kontrolluar në evidencë vitin e lindjes së pacientes dhe bëhet fjalë për një 60-vjeçare, e cila për fat të keq është në mesin e shtatë viktimave të cilat dje kanë ndërruar jetë në Spitalin Klinik të Tetovës”.
Këtë e tha mjeku dhe koordinatori në Spitalin e Tetovës, Gzim Nuredini. Ai shtoi se përveç 60-vjeçares, kanë ndërruar jetë edhe gjashtë të tjerë, të moshës 43, 57, 51, 67, 73 dhe 76.
Ai tha se viktimat zakonisht kanë sëmundje kronike.
“Gruaja 60-vjeçare që vdiq nga komplikimet nga Covid-19 kishte sëmundje kronike, hipertension, diabet, ndërsa edhe pacienti 43-vjeçar gjithashtu kishte sëmundje kronike. Këshillojmë që të paraqiten më herët ata që janë pozitiv dhe që kanë simptoma, të kërkojnë ndihmë dhe këshilla nga mjekët adekuatë”, tha Nuredini.
Ai gjithashtu tha se është e rëndësishme të mos ketë grupime nga ata që dëshirojnë të vaksinohen, ndërsa i bëri thirrje policisë që të mbajë rregull.
