Dokumente, bizhuteri, një veturë e dy pasaporta janë konfiskuar gjatë një bastisje të Policisë së Kosovës në pronat e Driton Ajetit, pronarit të një “shkolle online” në Gjilan të enjten, tha Policia e Kosovës.
Në raportin 24-orësh të premten, Policia bëri të ditur se gjatë kontrollit në pronat e Ajetit janë konfiskuar edhe disa pajisje elektronike dhe një telefon celular.
“Gjatë kontrollit te i njëjti i janë gjetur dhe konfiskuar si prova materiale: disa dokumente, disa stoli-bizhuteri të dyshuara, disa paisje elektronike, një veturë, dy pasaporta dhe një telefon celular”, thuhet në raportin policor.
Gazeta raportoi për arrestimin e Ajetit, pronarit të platformës private “Shkolla Shqipe”.
Ajeti u arrestua nën dyshimin për mashtrim, tha prokurori Agron Uka.
Uka, tha se hetimet ndaj Ajetit mund të zgjerohen në drejtim të veprave të tjera penale, si zhvatja apo ndonjë tjetër.
“Ai u arrestua para pak çastesh, derisa dyshohet për veprën penale të mashtrimit. Gjithsesi, priten ekspertiza të tjera, duke thënë që nuk mund të thuhet tutje për akuza të reja potenciale, pra zhvatje ose ndonjë tjetër”, tha Uka.
