Zëvendës Presidentja amerikane Kamala Harris do të vizitojë për herë të parëqë nga ardhja e saj në detyrë kufirin amerikan me Meksikën
Vizita në El Paso është planifikuar të zhvillohet të premten. Zonja Harris është kritikuar nga të dy anët e spektrit politik për mos shkuarjen e saj në kufirin me Meksikën pavarësisht se ajo mori rolin kryesor të administratës së Presidentit Biden për të trajtuar situatën e imigracionit në rritje.
Sekretari i Sigurisë Kombëtare, Alejandro Mayorkas, do ta shoqërojë zonjën Harris gjatë udhëtimit.Deri më tani, zonja Harris i ka përqendruar përpjekjet e saj në përmirësimin e kushteve ekonomike dhe të jetesës në rajon.
Ndihmësit e Zëvendës Presidentes Harris kanë këmbëngulur se fokusi i saj dallon nga çështjet e sigurisë me të cilat përballen zyrtarët amerikanë të cilët po përpiqen të trajtojnë shtimin e kalimeve të kufirit.
Zonja Harris është ngarkuar nga Presidenti Joe Biden për të shqyrtuar shkaqet kryesore të migrimit nga Amerika Qendrore drejt Shteteve të Bashkuara.
