Autoritetet amerikane ngritën akuza të martën ndaj një kolumbiani për komplot për të kryer vrasje ose rrëmbim jashtë Shteteve të Bashkuara në lidhje me vrasjen e presidentit haitian, Jovenel Moise, akuzat e para zyrtare për vrasjen.
Haiti ka arrestuar dhjetëra njerëz pas vrasjes që ndodhi në muajin korrik e cila krijoi një vakum politik në atë vend. Por Haiti nuk ka ngritur akuza ndaj askujt dhe hetimet kanë shkaktuar ankesa për vonesa dhe frikësim të zyrtarëve.
Departamenti Amerikan i Drejtësisë tha në një deklaratë se Mario Palacios, një ish-oficer ushtarak kolumbian, ishte pjesë e një komploti që fillimisht kishte planifikuar të rrëmbente zotin Moise, por plani u tjetërsuanë një komplot vrasjeje pasi autorët nuk ishin në gjendje të siguronin një aeroplan për të rrëmbyer presidentin nga Haiti.
“Në bazë të dokumenteve të depozitura thuhet se, më 7 korrik 2021, Palacios dhe të tjerë hynë në rbanesën e presidentit në Haiti me qëllimin për të vrarë Presidentin Moise, dhe në fakt presidenti u vra”, thuhet në deklaratën e Departamentit të Drejtësisë.
Palacios u akuzua gjithashtu për, “mbështetje materiale që rezultoi në vdekje".
Një anëtar i komplotit, një haitiano-amerikan i përshkruar si “bashkë-komplotisti #1, udhëtoi në Shtetet e Bashkuara në fund të qershorit për të kërkuar ndihmë për të çuar më tej planin”, thuhet në deklaratë.
Të martën, i akuzuari Palacios doli para një gjykate në Majami, i veshur me rroba civile dhe pranga që ishin të lidhura me një zinxhir rreth belit të tij.
Duke folur në gjuhën spanjolle, Palacios i tha gjykatës nëpërmjet një përkthyesi se ai nuk njeh askënd në Shtetet e Bashkuara dhe se të ardhurat e tij të vetme janë një pension ushtarak kolumbian me vlerë rreth 375 dollarë në muaj.
Sipas një raporti të Policisë Kombëtare të Haitit në muajin gusht, Palacios ishte pjesë e një grupi prej pesë personash të njohur si “Ekipi Delta” që hyri në dhomën e gjumit të zotit Moise për ta vrarë atë.Katër anëtarët e tjerë të atij grupi janë në paraburgim në Haiti.
“Kryeministri Ariel Henry dëshiron vënien e drejtësisë në vend për vrasjen e Presidentit Jovenel Moise”, tha një zëdhënës i zyrës së kryeministrit.
Palacios u arrestua në Xhamajka në tetor dhe po deportohej të hënën në Kolumbi. Gjatë një qëndrimi në Panama, ai pranoi të udhëtonte në Shtetet e Bashkuara, tha Departamenti amerikan i Drejtësisë./VOA
