Zbehen shpresat për ndryshime në rregullat e votimit në Senat

Amerika

Zbehen shpresat për ndryshime në rregullat e votimit në Senat

Më: 13 janar 2022 Në ora: 22:30
Senati amerikan

Presidenti Joe Biden shkoi në Kongres të enjten në përpjekje për siguruar mbështetjen e të gjithë demokratëve të partisë së tij që të votojnë për ndryshimin e rregullores së Senatit që i mundëson palës kundërshtare të bllokojë çdo ligj që nuk siguron 60 vota.

Por që para se ai të shkonte gjasat për miratim u zbehën, pasi senatorja demokrate nga Arizona, Kyrsten Sinema tha se ishte kundër heqjes së këtij rregulli.

Zoti Biden dhe shumë demokratë të tjerë e kishin intensifikuar fushatën për të ndryshuar procedurën, në mënyrë që të bënin të mundur miratimin e një ligji për të drejtën e votës, në kushtet kur pakica republikane ka bllokuar pjesë kyçe të programit të administratës së tij.

Demokratët e shohin projekt-ligjin për të drejtën e votës si një shans të fundit për të eliminuar kufizimet e reja të votimit në shtetet e kontrolluara nga republikanët përpara zgjedhjeve të Kongresit më 8 nëntor të këtij viti, ku ata rrezikojnë të humbasin epërsinë shumë të ngushtë në të paktën një nga dhomat e Kongresit.

Demokratët thonë se projektligji do të mbronte të drejtën e votës, veçanërisht për pakicat dhe grupet me të ardhura të ulëta. Votuesit me ngjyrë kanë votuar historikisht për kandidatët demokratë.

Projektligji u miratua në Dhomën e Përfaqësuesve të kontrolluar nga demokratët të enjten, por Senati prej 100 anëtarësh aktualisht është i ndarë në mënyrë të barabartë mes demokratëve të partisë së zotit Biden dhe republikanëve.

Demokratët mund të sigurojnë shumicën e thjeshtë për të miratuar projektligje me votën e nënpresidentes Kamala Harris, e cila është presidente e Senatit. Por përpara se një projekt-ligj të hidhet në votë me shumicë të thjeshtë, Senati duhet të votojë për t’i dhënë fund debatit dhe sipas rregullores aktuale, një gjë e tillë kërkon 60 vota.

Kritikët thonë se ky mekanizëm procedurial është antidemokratik dhe pengon qeverinë federale t’u japë zgjidhje problemeve të vendit. Por përkrahësit thonë se rregullat aktuale i detyrojnë anëtarët e Senatit të punojnë për të arritur konsensus për çështje kritike dhe nuk e lejojnë partinë në pushtet të miratojë ndryshime gjithëpërfshirëse.

Udhëheqësit demokratë thonë se duan ta fusin legjislacionin për të drejtat e votës në kategorinë e ligjeve që kanë nevojë vetëm për një shumicë të thjeshtë.

Senatorja demokrate amerikane Kyrsten Sinema tha në një fjalim në Senat të enjten -- më pak se një orë para mbërritjes së zotit Biden – mekanizimi që njihet si “filibuster” është i nevojshëm për të parandaluar thellimin e ndasive politike në vend.

Kreu i republikanëve në Senat, Mitch McConnell, ka paralajmëruar gjithashtu se nëse demokratët arrijnë ta shfuqizojnë rregulloren që kërkon 60 vota, pala e tij do të gjejë mënyra të tjera për të ngadalësuar procedurën në Senat.

Edhe senatori tjetër demokrat Joe Manchin ka shprehur shqetësimin se votimi për elimimin e procedures që kërkon 60 vota, do t'u jepte mundësinë republikanëve të veprojnë si të duan, nëse rimarrin shumicën në zgjedhjet për Kongresin në nëntor.

Udhëheqësi i pakicës në Senat, Mitch McConnell përsëriti të mërkurën se republikanët kundërshtojnë legjislacionin për të drejtat e votës dhe ndryshimet në filibuster./VOA

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat