Tarifat e reja për pakot e vogla me vlerë deri në 800 dollarë janë ulur nga 120% në 54%, sipas një deklarate nga Shtëpia e Bardhë.
Tarifa fikse për çdo artikull do të mbetet 100 dollarë për dërgesat e dërguara pas 2 majit, ndërsa një tarifë prej 200 dollarësh që do të aplikohej nga 1 qershori është anuluar.
Gjigantët e shitjeve online kineze Shein dhe Temu më parë kishin përdorur përjashtimin "de minimis" për të dërguar artikuj me vlerë të ulët drejtpërdrejt te klientët në SHBA pa pasur nevojë të paguajnë taksa ose tatime importi. As Shein dhe as Temu nuk iu përgjigjën menjëherë kërkesave të BBC-së për koment.
Rregulli pa detyrim doganor u mbyll nga administrata Trump më herët këtë muaj, shkruan BBC, transmeton KosovaPress.
Disa blerës i thanë BBC-së se ata nxitonin të bënin blerje përpara këtij afati.
Normat më të reja erdhën pas një deklarate të përbashkët të SHBA-së dhe Kinës që njoftuan se do të ulin përkohësisht tarifat reciproke dhe do të nisin një raund të ri negociatash tregtare.
Tregjet e aksioneve u rritën të hënën pas deklaratës së Trumpit se bisedimet e fundjavës kishin rezultuar në një "rivendosje të plotë" të kushteve të tregtisë mes dy vendeve, një lëvizje që ndihmoi në uljen e shqetësimeve për një luftë tregtare mes dy vendeve.
Sipas marrëveshjes, SHBA do të ulë tarifat nga 145% në 30%, ndërsa tarifat hakmarrëse të Kinës për mallrat amerikane do të bien nga 125% në 10%.
Trump u tha gazetarëve se, pasi disa nga taksat janë pezulluar dhe jo anuluar plotësisht, ato mund të rriten përsëri pas tre muajsh, nëse nuk bëhet më shumë përparim.
Por presidenti tha se nuk priste që ato të ktheheshin në nivelet e mëparshme prej 145%.
"Ne nuk po kërkojmë të dëmtojmë Kinën", tha Trump pasi u njoftua marrëveshja, duke shtuar se Kina "po dëmtohet shumë keq".
Trump shtoi se priste të fliste me presidentin kinez Xi Jinping "ndoshta në fund të javës".
