Donald Trump ka thënë se do të “pezullojë përgjithmonë migrimin” drejt SHBA-së nga të gjitha “vendet e botës së tretë”, raporton BBC.
Presidenti i SHBA-së shkroi në Truth Social se kjo do të “lejojë sistemin amerikan të rikuperohet plotësisht” nga politikat që, sipas tij, kishin cenuar “përfitimet dhe kushtet e jetesës” së shumë amerikanëve.
Ai nuk dha detaje për planin e tij dhe as nuk përmendi se cilat vende mund të preken, raporton KosovaPress.
Komentet e tij erdhën një ditë pasi një shtetas afgan u akuzua për të shtënë me armë ndaj dy anëtarëve të Gardës Kombëtare në Uashington, nga të cilët njëri ka ndërruar jetë. Trump sugjeroi se incidenti nënvizon një kërcënim të madh për sigurinë kombëtare.
Pas të shtënave, ai premtoi të largojë nga SHBA çdo të huaj “nga cilido vend që nuk i përket këtu”. Po atë ditë, SHBA pezulloi përpunimin e të gjitha kërkesave të emigracionit nga afganët, duke thënë se vendimi u mor gjatë rishikimit të “protokolleve të sigurisë dhe verifikimit”.
Shërbimi i Shtetësisë dhe Imigracionit i SHBA-së (USCIS) tha se do të rishqyrtonte kartat e gjelbra të lëshuara për individët që kishin migruar në SHBA nga 19 vende, por njoftimi nuk e përmendi qartë sulmin e së mërkurës.
Kur BBC pyeti se cilat vende ishin në listë, agjencia iu referua një proklamate të qershorit nga Shtëpia e Bardhë që përfshinte Afganistanin, Kubën, Haitin, Iranin, Somalinë dhe Venezuelën. Nuk kishte detaje të tjera se si do të dukej ky rishqyrtim.
Postimi i Trump, i shkruar me tone të ashpra në dy pjesë të enjten në mbrëmje, shkoi edhe më tej, duke u zotuar se do të “përfundojë të gjitha përfitimet dhe subvencionet federale për jo-shtetasit”.
