Bashkimi demolon Prishtinën, fiton Superkupën e Kosovës - Bota Sot
Bashkimi demolon Prishtinën, fiton Superkupën e Kosovës

Basketboll

Bashkimi demolon Prishtinën, fiton Superkupën e Kosovës

Nga: Kemajl Goca Më: 24 shtator 2019 Në ora: 19:33
Bashkimi demolon Prishtinën, fiton Superkupën e Kosovës

Kampionia e Kosovës, Prishtina, nuk i bëri ballë lojë maestrale të Bashkimit nga Prizreni, në finalen e Superkupës së Kosovës (femrat), që u zhvillua në palestrën “Mizahir Isma” në Rahovec. Bashkimi demolon Prishtinën me rezultat 83:70 (23:15, 21:17, 22:16, 17:22).

Vashat e trajnerit të Prishtinës, Fidan Shatri, nuk ishin në elementin e duhur, ndërsa prizrenaset administruan lojën me shumë mençuri dhe me plotë meritë edhe triumfuan. Bashkimi e nisi në mënyrën më të mirë edicionin e ri, me trofeun e Superkupës së Kosovës, ndërsa prishtinaset dëshpëruan. Qysh në çerekun e parë Bashkimi konfirmoi forcën, duke i bërë me dije se trofeu do të shkoi në Prizren, ashtu edhe ndodhi.

Në minutën e 10-të, Bashkimi ishte në epërsi me 8 pikë (15:23). Në çerekun e dytë pritej një reagim më i mirë i kryeqytetasve, megjithatë nuk ndodhi dhe rritet epërsia e vashave prizrenase në 12 pikë (32:44).

Të gjithë menduan se pushimi 15 minuta do të ndikoi pozitivisht te Prishtina, por as kjo nuk i bëri punë, sepse vashat e Bashkimit e kishin mbrëmjen e tyre dhe nuk lejuan në asnjë moment që bardhekaltrat t’ia rrezikojnë epërsinë, në fakt ishte edhe një hakmarrje për humbjen e finaleve të play-off-it në edicionin që e lamë pas.

Në minutën e 30-të, rezultat i keq për bardhekaltrat për faktin se në semafor shënonte 48:66 në favor të Bashkimit apo 18 pikë epërsi, që vështirë edhe të shkrihej. Kjo epërsi i dha edhe më shumë krahë vashave nga Prizreni, të cilat në çerekun e fundit luajtën me komoditet, ndërsa Prishtina nuk e gjente në asnjë formë mundësinë për ta shmangur humbjen e thellë.  

Në minutën e 38-të, gjithçka dihej sepse Bashkimi kishte epërsinë në 15 pikë (65:80) dhe festa kishte filluar te prizrenaset. Basketbollistja Khadija Brown ka qenë më e dalluara te Bashkimi me 32 pikë, e ndihmuar nga Aisha Muhamed me 18 sosh etj. Danisha Shaw u shqua te Prishtina me 31 pikë, por as që i mjaftuan për ta evituar humbjen, ndërsa lojtaret tjera nuk ishin në ritmin e pritur. 

Prishtina-Bashkimi 70:83
Palestra e sportit “Mizahir Isma” në Rahovec.
Gjyqtarë: Xhelal Mumini, Ngadhnjim Shabani, Amar Gjekoviq.
Prishtina: Shatri 8, Shaw 31, Konjusha 13, Rushiti 2, Myers 10, Ajeti 3, Kamerolli, Martinaj 3, Ukaj, Rexhaj dhe Dekaj.
Bashkimi: Brown 32, Emra 4, Daci 12, Perçuku 15, Muhamed 18, V. Vraniqi, Muhadri 2, Baliqi, Gashi, Çejku, Krasniqi dhe S. Krasniqi.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...