Gazeta kroate: Varrezat masive në Serbi janë provë se shteti qëndron pas krimit

Dokumentare

Gazeta kroate: Varrezat masive në Serbi janë provë se shteti qëndron pas krimit

Nga: B.S. Më: 27 nëntor 2020 Në ora: 12:57
Ana Bërnabiq e Aleksandar Vuçiq

Ndonëse kërkimet në guroren serbe Kizhevak, e cila gjendet në komunën e Rashkës afër kufirit me Kosovën, ka filluar në vitin 2015, vetëm disa ditë më parë, falë imazheve satelitore, një tjetër varr masiv u zbulua. Megjithëse nuk është konfirmuar ende, 15 deri në 17 trupa të shqiptarëve të Kosovës nga fshati Rezallë i Kosovës, të cilët u qëlluan për vdekje më 5 prill 1999, besohet të jenë varrosur në varrezën e re masive. Sipas raportit të Fondit për të drejtën humanitare, pjesëtarët e suhtrisë e të policisë atë ditë kanë hyrë në fshat, i kanë dëbuar të gjithë vendasit dhe më pas i kanë pushkatuar 39 prej tyre. Tre fëmijë ishin mes të pushkatuarve, dhe viktima më e vjetër ishte 97 vjeç. Megjithatë, dy vendas u mbijetuan të shtënave, duke u mbuluar nga trupat e burrave të vdekur. Të dy më pas zbuluan gjithçka që kishte ndodhur.

Në frigoriferët ushtarakë

Edhe më i frikshëm është fakti që kjo është varreza e pestë masive me trupat e shqiptarëve të Kosovës të gjetur në Serbi që nga përfundimi i luftës në Kosovë. E para prej tyre u gjet në vitin 2001 në Batajnicë, vetëm 15 kilometra nga qendra e Beogradit. 

Atje, në vendin e stërvitjes së policisë, u varrosën 744 trupa. Në të njëjtin vit, një varrezë masive me 61 trupa u gjet në Serbinë lindore, në Petrovo Sello. Në vitin 2001, një varrezë masive që përmbante 84 trupa u gjet afër Liqenit të Perushaqit, dhe në vitin 2013, një varrezë e katërt masive me 52 trupa të shqiptarëve të Kosovës u gjet afër Rudnicës, vetëm disa kilometra larg gurores së Kizhevakut. 

- Deri më tani, eshtrat e 941 personave janë gjetur në varre masive në Serbi, nga 2001 deri më sot. Këto janë të gjitha eshtrat e shqiptarëve nga Kosova që u vranë në Kosovë, dhe më pas u transportuan dhe u varrosën fshehurazi në Serbi. Meqenëse ka 1642 më shumë njerëz në listën e të zhdukurve në Kosovë, nuk do të na habisë nëse gjejmë edhe disa varre masive në Serbi - thotë drejtori ekzekutiv i Qendrës për të drejtën humanitare Ivana Zhaniq.

Sipas saj, e gjithë kjo tregon për mënyrën sistematike të punës, e cila filloi me vrasje në terren, pasuar nga pastrimi i terrenit, dhe së fundmi zhvendosja e trupave dhe varrosja në varre masive me qëllim të fshehjes së krimeve dhe gjetjes së trupave. Ajo e shpjegon këtë me faktin se në transportin e trupave, nga Kosova deri në, për shembull, Batajnicë, e cila është një distancë prej disa qindra kilometrash, të gjitha logjistikat ishin përpunuar dhe se kjo nuk mund të bëhej brenda natës.

- Udhëheqja politike e atëhershme e Serbisë, e kryesuar nga Slobodan Millosheviqi, ishte përgjegjëse për të gjithë operacionin, si dhe Ushtria e atëhershme Jugosllave, MUP, shërbimet e sigurisë… Frigoriferët e ushtrisë ishin në veprim, të cilët transportonin trupa, dhe të cilëve policia ua lironte rrugët, sepse kishin një urdhër të tillë. Duke arritur në vend, trupat u varrosën në varret e para-gërmuara. E gjithë kjo ishte një përpjekje për të fshehur trupat, dhe kështu të mbulonte krimet, dhe kështu të parandalonte hetimin e bashkësisë ndërkombëtare. Ata llogaritën se askush nuk do t'i kërkonte ose do të ishte në gjendje t'i gjente trupat e të vrarëve në Serbi - tha Zhaniq.

Askush nuk është gjykuar

Është gjithashtu interesante që krimet e luftës në fshatin Rezallë ndodhën në zonën e përgjegjësisë së Brigadës së 3-të të motorizuar të ushtrisë së atëhershme Jugosllave, komanduar nga Gjenerali Lubisha Dikoviq, i cili nga viti 2011 deri në vitin 2018 ishte shefi i Shtabit të Ushtrisë serbe. 

- Askush nuk është ndjekur penalisht për ekzistencën e varreve masive në territorin e Serbisë, përfshirë gjeneralin Dikoviq. Fondi vazhdimisht ka apeluar për këtë, por pa rezultat. Fakti që gjenerali Dikoviq komandonte zonën e përgjegjësisë ku ishin kryer krimet dhe rehabilitimi i terrenit flet për përgjegjësinë e tij. Si komandant, ai duhej të dinte se një numër i madh civilësh ishin vrarë dhe se trupat e tyre ishin transportuar në Serbi - tregon Zhaniq. 

Është gjithashtu interesante që udhëheqësit e Serbisë ende heshtin për faktin se një varrezë tjetër masive me eshtrat e shqiptarëve nga Kosova është gjetur në territorin e saj. Deri më tani, as kryetari i shtetit Aleksandar Vuçiq, as kryeministrja Ana Bërnabiq e as ndonjë nga ministrat në Qeveri nuk kanë thënë një fjalë të vetme. Por është Komiteti i punëve të jashtme i Dhomës së përfaqësuesve të ShBA-ve, i cili shkroi në llogarinë e tij zyrtare në Twitter se "trupat e varrosur në Serbi ende po gjenden, viktima të spastrimit etnik të Millosheviqit në Kosovë". Ata gjithashtu deklaruan se për shkak të varreve masive dhe fshehjes së krimeve, askush nuk u mor në përgjegjësi para gjykatave në Serbi, shkruan gazeta kroate "Veçernji list".

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat