Lira turke ra me një tjetër 8 për qind sot pasi presidenti Recep Tayyip Erdogan mbrojti bankën qendrore, e cila uli ndjeshëm normën referencë të interesit javën e kaluar.
Ai tha se do të fitonte “luftën e tij për pavarësi ekonomike” pavarësisht kritikave dhe lutjeve të shumta për të ndryshuar kursin.
Monedha turke ra sot në 12.49 lira kundrejt dollarit, në një nivel të ri të ulët pas rrëshqitjes në 11 sesionet e fundit radhazi. Ajo ka humbur deri në 40 për qind të vlerës së saj këtë vit, duke përfshirë një rënie prej gati 20 për qind që nga fillimi i javës së kaluar, raporton Reuters.
Sipas agjencisë britanike, Erdogan ushtroi presion mbi bankën qendrore për t’u kthyer në një cikël agresiv të lehtësimit monetar me qëllim, siç thotë ai, të stimulojë eksportet, investimet dhe krijimin e vendeve të punës, pavarësisht rritjes së inflacionit në afër 20 për qind dhe përshpejtimit të zhvlerësimit të monedhën kombëtare e cila po gërryen pagat e turqve.
Ish-zëvendës guvernatori i bankës qendrore, Semih Tumen, i cili u zëvendësua nga Erdogan muajin e kaluar, bëri thirrje për një kthim urgjent të politikës që mbron vlerën e lirës.
“Ky eksperiment irracional që nuk ka shanse të ketë sukses duhet të braktiset menjëherë dhe ne duhet të kthehemi në një politikë cilësore që mbron vlerën e lirës turke dhe prosperitetin e popullit turk”, shkroi ai në Twitter.
Lira po shënon rezultatin më të keq midis monedhave të tregjeve në zhvillim këtë vit, kryesisht për shkak të, siç thonë analistët, “lehtësimit të pamatur dhe të parakohshëm monetar”.
Kundrejt euros, monedha turke u ul në një nivel të ri rekord prej 13.4035 lirash.
Rendimenti i obligacioneve të qeverisë 10-vjeçare të referencës u rrit mbi 21 për qind për herë të parë që nga fillimi i 2019. Vlera e obligacioneve të qeverisë turke të shprehura në dollarë ra me më shumë se një cent në fillimin e tregtimit të sotëm, sipas të dhënave nga Trade Web.
Për shkak të rënies së lirës, indeksi kryesor i aksioneve në bursën e Stambollit ra me 1.5 për qind për shkak të vlerësimeve të papritura të lira të vlerës së tyre.
Të enjten e kaluar, Banka Qendrore e Turqisë uli me 100 pikë bazë normën e interesit në 15 për qind, e cila është dukshëm nën inflacionin prej gati 20 për qind dhe tregoi uljen e mëtejshme të saj.
Që nga shtatori, ajo ka ulur normën e interesit të referencës me një total prej 400 pikësh, për të cilën analistët thonë se është një “politikë e gabuar e rrezikshme”, duke pasur parasysh kthimet reale thellësisht negative dhe duke qenë se pothuajse të gjitha bankat e tjera qendrore kanë filluar të shtrëngojnë politikën monetare ose janë duke u përgatitur për ta bërë këtë.
