Medvedevi ia beson ministrit serb Popoviq "luftën kundër ndërhyrjeve të huaja"

Evropë

Medvedevi ia beson ministrit serb Popoviq "luftën kundër ndërhyrjeve të huaja"

Nga: Bota sot Më: 21 nëntor 2026 Në ora: 09:57
Nenad Popoviq- Lavrov

Nenad Popoviq, ministër pa portofol në qeverinë në detyrë të Serbisë dhe nën sanksione amerikane për lidhjet me Rusinë, është emëruar koordinator i luftës kundër “ndërhyrjeve të huaja në zgjedhje” në një lëvizje ndërkombëtare të themeluar nga partia ruse në pushtet, raporton Radio Evropa e Lirë.

Detyrën ia caktoi më 16 nëntor kryetari i Rusisë së Bashkuar, Dmitry Medvedev, në një takim të lëvizjes “Për Lirinë e Kombeve!”. Medvedev pretendoi se “shumë vende perëndimore ndërhyjnë pa hezitim në proceset zgjedhore”.

Emërimi vjen pas zgjedhjeve të parakohshme të 25 tetorit në Serbi, në të cilat fitoi Lista Studentore dhe humbi kampi i Aleksandar Vuçiqit, pjesë e qeverisë së të cilit është Popoviq. Pushteti në largim i ka cilësuar protestat studentore si “revolucion me ngjyra”, pra si të nxitura nga shërbime të huaja, dhe zyrtarët rusë e kanë mbështetur këtë tezë.

“Nismë e vetë Popoviqit”

Vuk Vuksanoviq, ligjërues në King’s College të Londrës, i tha Radios Evropa e Lirë se roli i ri nuk është lëvizje strategjike e Rusisë. Sipas tij, ka më shumë gjasa të jetë përpjekje e vetë Popoviqit, si përfaqësues i elitës që humbi, për t’i shfrytëzuar lidhjet me Moskën dhe për ta sulmuar pushtetin e ri.

Popoviq është nën sanksione të SHBA-së që nga viti 2023. Lëvizja “Për Lirinë e Kombeve!” u themelua në shkurt 2024 me mbështetjen e presidentit Vladimir Putin.

Pas fitores së Listës Studentore, Kremlini ka thënë se dëshiron ta vazhdojë bashkëpunimin me Beogradin. Vuksanoviq pret që Moska të sillet në mënyrë pragmatike me pushtetin e ri dhe që çështja e Kosovës e çmimi i gazit të jenë ndër temat kryesore. Serbia merr nga Rusia më shumë se 80 për qind të gazit që përdor dhe nuk i ka vendosur sanksione Moskës për pushtimin e Ukrainës.

Sot mund të lexoni Shfletoni kopertinat