Franca: Marrëveshja për embargon ndaj naftës ruse mund të arrihet këtë javë

Evropë

Franca: Marrëveshja për embargon ndaj naftës ruse mund të arrihet këtë javë

Më: 10 maj 2022 Në ora: 09:32
Emmanuel Macron

Ministri francez i Çështjeve Evropiane, Clement Beaune, tha se anëtarët e Bashkimit Evropian mund të arrijnë një marrëveshje gjatë kësaj jave për propozimin e Komisionit Evropian për ndalesën e të gjitha importeve të naftës nga Rusia.

“Mendoj se ne mund të arrijmë marrëveshje gjatë kësaj jave”, tha Beaune për televizionin LCI.

Ai shtoi se presidenti francez, Emmanuel Macron, më vonë gjatë 10 majit, do të bisedojë me kryeministrin hungarez, Viktor Orban, për këtë çështje.

Hungaria është kritikja më e madhe e embargos mbi naftën ruse.

Presidentja e Komisionit Evropian, Ursula von der Leyen, tha të hënën se ka bërë përparim në bisedimet me Orbanin, sa i përket kësaj çështjeje.

Më 4 maj, von der Leyen, prezantoi propozimin e KE-së, si pjesë e pakos së gjashtë të sanksioneve të BE-së kundër Rusisë, për shkak të pushtimit të Ukrainës.

Komisioni parashikon që BE-ja të heqë dorë plotësisht nga nafta e papërpunuar ruse dhe produktet e rafinuara deri në fund të vitit. Por, për të miratuar këtë pako të gjashtë të sanksioneve kërkohet mbështetja unanime e 27 shteteve anëtare të bllokut evropian./REL

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat