Mbrëmje emocionuese futbolli në “Unipol Domus” të Cagliarit, aty ku vendasit mbyllën sezonin 2023-2024 me një humbje 2-3 përballë Fiorentinës, por natyrisht që rezultat që nuk mërzit aspak sardët.
Gjithçka nisi me një duartrokitje të gjatë mirënjohëse për trajnerin e sardëve, Claudio Ranieri, i cili në moshën 72-vjeçare njoftoi se kjo do të ishte sfida e tij e fundit në pankinë, pasi kishte vendosur të tërhiqej.
Më pas vëmendja kaloi në fushë, aty ku pjesa e parë u mbyll me avantazhin e Fiorentinës, që shënoi me anë të Bonaventurës. Në pjesën e dytë u shfaq një tjetër Cagliari, që barazoi me Deiolën në të 64-ën dhe mori avantazhin në të 85-ën me një gol spektakolar të të riut Mutandwa, i cili shënoi nga distanca.
Megjithatë Fiorentina reagoi shpejt dhe riktheu baraspeshën me Nico Gonzales, ndërsa në sekondat e fundit VAR-i ndihmoi “vjollcët”, të cilët fituan një penallti, e shndërruar më pas në gol nga Arthur.
Tre pikë për Fiorentinën, që siguron edhe matematikisht pjesëmarrjen në Conference League dhe tashmë do të provojë të fitojë këtë trofe në finalen e 29 majit në Athinë përballë Olympiacosit.
Nga ana tjetër në Cagliari pati festë edhe pas humbjes, pasi përveç ceremonisë nderuese ndaj Ranierit, nuk munguan duartrokitjet as për zv.kapitenin Naihtan Nandez, i cili luajti gjithashtu ndeshjen e fundit me fanellën e klubit sard.
