Ndonëse humbi finalen e plejofit nga Besa Famgas, Kastrioti i Ferizajt ka pasur një stinor shumë të suksesshëm. Kastrioti ka fituar Kupën, ka kaluar për herë të parë një rreth të garave në Kupa Evropiane dhe ka rivalizuar fuqishëm Besën në garën për titull të kampionit. Të dy ndeshjet finale u vendosën me nga një gol dallim dhe vetëm në sekondat e fundit.
Qendra Vlerson Zherka ka dhënë kontributin e tij të çmueshëm në gjithë këto suksese, ndërsa ai është i lumtur që qyteti i Ferizajt sërish po frymon me hendbollin.
“Ndeshjet finale ishim mjaft rivalizuese, të forta, cilësore dhe shumë interesante. Të dy ndeshjet i humbëm në minutat e fundit dhe mendoj që edhe fati na mungoj në momentet vendimtare në të dy takimet, si në Pejë ashtu edhe në Ferizaj. Por kjo nuk zbeh aspak sukseset e KH Kastriotit në këtë edicion, ku pas shumë kohësh fituam Kupën e Kosovës.
Kaluam poashtu për herë të parë një xhiro në garat ndërkombëtare dhe ajo çka është më e rëndësishme, arritëm të bëjmë që qyteti i Ferizajt përsëri të frymojë me hendbollin. Kjo është e arritura më e madhe, por gjëra tjera të mëdha na presin në të ardhmen”, ka deklaruar Zherka.
