Dita Ndërkombëtare për të Drejtat e Njeriut e gjen Kosovën me shumë padrejtësi sa i përket çështjes për persona të zhdukur.
Neni 3 dhe 4 nga Deklarata Universale e të drejtave të Njeriut thotë: Gjithkush ka te drejtë të jetojë, të jetë i lirë dhe të ketë siguri vetjake. Asnjeri nuk duhet të mbahet si skllav, ose çifti, skllavëria dhe tregtia e skllevërve janë të ndaluar në të gjitha format.
Dy dekada pas luftës familjet e mbi 1.650 personave që ende figurojnë të zhdukur, ende nuk kanë arritur të paktën t’i gjejnë eshtrat e më të dashurve të tyre për t’ua ditur varret ku i kanë.
Kaq vjet pas lufte familjarët e personave të zhdukur janë injoruar vazhdimisht si nga institucionet ndërkombëtare të angazhuara në Kosove po ashtu edhe nga institucionet e vendit duke mos bërë atë që u takon si shtet. Këtë e dëshmuan edhe në bisedimet që po zhvillohen ndërmjet Kosovës dhe Serbisë në Bruksel, ku pala kosovare edhe njëherë dështoi duke mos e futur si prioritet këtë çështje. Duke mos e kushtëzuar Serbinë me gjetjen dhe dorëzimin tek autoritetet kosovare personat që ende figurojnë të zhdukur.
Institucionet e Republikës te Kosovës përpos qe po shkelin te drejtat e familjareve te personave te zhdukur ata po e shkelin edhe Kushtetutën e Republikës të Kosovës, sepse Kushtetuta i obligon që të interesohen dhe të mbrojnë të drejtat e njeriut e në ketë rast edhe për çështjen e të zhdukurve.
Çështjen e te zhdukurve liderët shtetëror e përmendin vetëm ne fushata zgjedhore dhe para bisedimeve me Serbin duke mashtruar familjaret dhe qytetaret qe çështja e te zhdukurve duhet te jete prioritet, edhe pse asnjëherë kjo teme nuk u diskutua.
Institucionet e Kosovës në vend se të bëjë presion tek autoritetet serbe për gjetjen e personave të zhdukur, ajo po e ka komoditetin që t’u krijojë favore çdo ditë në rend të parë vetë Serbisë, të cilës po ia hap rrugën drejt integrimit evropian pa asnjë kushtëzim dhe po ashtu serbëve të cilët jetojnë në Kosovë.
U bëjmë thirrje Presidentit, Kuvendit, Qeverisë së Kosovës, Komisionit Qeveritar për Persona të Zhdukur, dhe të gjitha institucioneve ndërkombëtare, ambasadave te shteteve me ndikim e posaçërisht Ambasadës së Shteteve të bashkuara të Amerikës të që shfrytëzojë ndikimin e vetë te qeverisa e Serbisë ashtu si vepruan për vëllezërit Bytyqi që të punojnë në zbardhjen e fatit të zhdukurve që familjarët e tyre të dinë njëherë e përgjithmonë se ku i kanë varret e më të dashurve të tyre. Po ashtu kërkojmë nga institucionet që të mos mjaftohen vetëm me deklarata mediale, por të punojnë në këtë drejtim.
Familjarët e personave të zhdukur dhe mbarë qytetarët e Kosovës. vazhdojnë të kërkojnë respektimin e të drejtave të tyre, të dinë për fatin e më të dashurve të tyre, të zhdukur gjatë viteve të luftës, dhe të drejtat tjera të garantuara me konventat ndërkombëtare.
Latif Mehmeti
Shoqata për persona të zhdukur dhe viktima të luftës
“Përkorë” Podujevë