Gjykata Themelore në Gjilan ka aprovuar kërkesën e Prokurorisë Themelore të Gjilanit, duke i caktuar masën e paraburgimit prej 30 ditë të pandehurve A. B. dhe Sh. B.
Ekziston dyshimi i bazuar se më datë 3 shtator 2019, rreth orës 09:40, në rrugën “Esat Berisha” në Gjilan, derisa i dëmtuari L. Z. kishte qenë duke e drejtuar automjetin e tij në vijat e këmbësorëve, të pandehurit në shenjë revolte godasin automjetin e tij, më pas hapin derën e veturës dhe përdorin forcën ndaj tij.
Me këto veprime të pandehurit dyshohet të kenë kryer veprat penale ‘’sulmi” dhe “shkaktimi i rrezikut të përgjithshëm” vepra të sanksionuara me Kodin Penal të Republikës së Kosovës (KPRK).
Gjyqtari i procedurës paraprake në Departamentin e Përgjithshëm, pas shqyrtimit të shkresave të lëndës, ka konsideruar se janë përmbushur kushtet ligjore për caktimin e masës së paraburgimit ndaj të pandehurit, pasi që masat tjera alternative do të ishin të pamjaftueshme për zhvillimin normal të procedurës penale.
Palët kanë të drejtën e ankesës ndaj këtij vendimi në Gjykatën e Apelit.
