Në Malishevë, është mbajtur nata e parë e festivalit mbarëkombëtar të folklorit “Oda e Llapushës”, edicioni i pestë.
Këtij aktiviteti me rëndësi në fushën e kulturës dhe trashëgimisë, i kanë paraprirë një varg aktivitetesh, ndërsa festivali mbahet në kuadër të aktiviteteve që zhvillohen për “Javën e Mërgimtarëve” në Malishevë, përfshi edhe një sesion shkencor për folklorin në trevën e Llapushës.
Sipas kumtesës për media, në natën e parë të festivalit kanë marrë pjesë 21 grupe, ansamble dhe rapsod, nga të gjitha trevat shqiptare, ndërsa është përcjellë nga qytetarët të shumtë, mërgimtarë, personalitete të kulturës dhe artit, si përfaqësues të institucioneve shtetërore e lokale, duke filluar nga zëvendëskryeministri i parë në Qeverinë e Republikës së Kosovës, Fatmir Limaj, nënkryetari i Malishevës, Hajdin Berisha, zëvendësministra, deputet të Kuvendi të Kosovës dhe personalitete të tjera.
Në hapjen e festivalit, deputeti i Kuvendit të Kosovës, nënkryetari i Komunës së Malishevës, Hajdin Berisha, i cili edhe shpalli të hapur festivalin tashmë tradicional “Oda e Llapushës”, ndër tjera tha:
“Duke i nisur nga sesioni shkencor që u mbajt sot dhe kumtesat e prezantuara, nga profesionistët e folklorit shqiptar, u vlerësua se festivali “Oda e Llapushës”, është festivali që ka shënuar rritjen më të madhe, si në cilësi ashtu edhe në masivizim dhe profesionalizimin më të madh, brenda një periudhe të shkurtër. Kam nderin që në emër të Komunës së Malishevës, zyrtarisht ta shpalli ta hapur të këtë festival, i cili tashmë ka marrë rrugë”. Nënkryetari Berisha, në mënyrë të veçantë të i ka përshëndetur gjithë bashkatdhetarët.
Kurse deputeti i Kuvendit të Kosovës, Enver Hoti, duke e marrë fjalën e rastit.
“Askund më mirë nuk shkon ky emër dhe ky zë, se në vatrën e folklorit shqiptar, në zëmër të Kosovës, në zëmër të shqiptarisë, në Malishevë, dhe sonte në këtë festival ne i kujtojmë të gjithë brezat që luftuan ndër shekuj, deri në luftën çlirimtare, dhe na mundësuan që ne sot të jetojmë të lirë, të festojmë dhe ti kujtomë me krenari”, tha ai.
Zymer Neziri, Adem Zejnullahu dhe Izet Durak, e përbëjnë jurinë profesionale të festivalit “Oda e Llapushës”, ndërsa drejtoreshë e festivalit është drejtoresha e Drejtorisë për Kulturë, Rini dhe Sport, Besartë Kryeziu-Ramaj.
Festivali vazhdon sonte me natën e dytë dhe të fundit, ku edhe do të përcaktohen çmimet e festivalit nga juria profesionale.
