“Maqedonia e Bashkuar” një subjekt prorus në Maqedoninë e Veriut i ka bërë thirrje ministrit të jashtëm, Nikolla Dimitrov që menjëherë të dëboj ambasadorin e Kosovës në Shkup, Gjergj Dedaj për siç thuhet ndërhyrjen e ashpër në punët e brendshme të shtetit.
Sipas tyre, ambasadori kosovar në Maqedoninë e Veriut, bëri një deklaratë të fortë në lidhje me ekstradimin e Tomor Morinës në Serbi.
“Ambasadori i Kosovës në një deklaratë televizive hapur zyrtarisht i çoi porosi të fortë Maqedonisë nëse vjen tek ekstradimi i shtetasit të saj në Serbi. Procedura për ekstradim është kompetencë e gjykatave të vendit, ndërsa përzierja në punët e brendshme dhe mosrespektimi i detyrës së tij është në kundërshtim me Konventën e Vjenës për marrëdhënie diplomatike”, thuhet ndër të tjera nga kjo parti, e cila është kundër anëtarësimit të vendit në NATO dhe pro lidhjeve me Rusinë.