Lei Krajën e kemi parë gjithmonë të qeshur e solare nëpër intervista, por kjo e sotmja ishte paksa më e vështirë se të tjerat. Kjo për shkak se u prek një nga temat më delikate për të, një temë që ajo nuk e kishte diskutuar asnjëherë publikisht, divorci i prindërve.
E ftuar në “N’fermë”, Lei dhe Ervini patën një nga ato bisedat që të prekin vërtet zemrën. Modelja dhe moderatoja foli për mënyrën e vështirë si e kishte përjetuar vendimin e prindërve, që siç rrëfeu ajo, në fakt i ndryshoi gjërat për mirë.
“Periudha më e vështirë ka qenë kur u divorcuan prindërit e mi. Kam qenë shumë e vogël. Kam qenë 14 vjeçe dhe e përjetova shumë keq... Kemi qenë katër fëmijë, mbase sepse kam qenë më e madhja e kam ndjerë shumë. Thjesht nuk kishte paqe në shtëpi. Është normale kur ndahen dy njerëz, mbase... por është edhe mënyra si e menaxhojnë shqiptarët, nuk e kanë menaxhuar mirë në atë moment. Tani jam mirë, por atë vit u mërzita shumë, më dukej si fundi i botës”, -rrëfeu Lei, duke shtuar se qante çdo ditë dhe ishte paksa në depresion, nuk hante mirë dhe ra nga mësimet dukshëm.
E pyetur se me kë qëndroi nga prindërit, ajo tha se në fakt e dërguan në Shqipëri dhe e kaloi atë periudhë në Shkodër.
“Më nisën në Shqipëri, kam qëndruar në Shkodër. Qëndrova një vit aty për ta kaluar, sa të sistemoheshin ata. Mbase kjo është arsyeja pse e kam kaq shumë qejf Shqipërinë... Çdo gjë ndodh për një arsye. Realisht atëherë e përjetova shumë keq, ndërsa tani jam shumë e lumtur që prindërit e mi janë ndarë, sepse asnjë martesë nuk duhet të shtyhet sa për hir të fëmijëve, opinionit, njerëzve, kulturës...”
Lei u shpreh se asokohe mendonte se asgjë s’do ishte më njësoj, por gjërat ndryshuan për mirë. E pyetur për ngrohtësinë që i kanë dhënë prindërit, ajo u përgjigj:
“Ngrohtësi më kanë dhënë në mënyrën e tyre... Dëgjo, kur u ndanë prindërit, mami punonte më shumë dhe u fokusua shumë te puna, te vetja, bëri shumë sakrifica, punonte 7 ditë në javë. Mundohej të ishte sa më e pranishme, por ideja është se mbase na ka munguar ai afrimiteti që na duhej... Ose do punosh, ose do rrish në shtëpi nuk mund t’i bësh të dyja.”
Në fund Ervini e pyeti se çfarë do të bënte Lei me fëmijët në të ardhmen, që nuk e kanë bërë prindërit e saj.
“Nuk dua të flas keq, sepse kanë qenë aty për mua në momentet e vështira, mami edhe babi... Thjesht do flisja më shumë me fëmijët e mi, nuk do t’i paragjykoja. Do të doja të isha më e afërt, të më kuptonin, sepse secili është ndryshe”, -u shpreh ajo.
Lei e mbylli intervistën duke thënë se edhe ajo po të jetë në një martesë që nuk shkon diçka, do ndahet dhe shtoi se ka jetë edhe pas ndarjes!