Sa larg shkon kryekomandant Putini? Kush mund ta ndalojë atë? Çfarë gabimesh nuk duhet të bëjë Perëndimi tani? Këto pyetje i bëri Marina Henke (39), Profesoreshë e Marrëdhënieve Ndërkombëtare në Shkollën Hertie në Berlin. Përfundimi i tyre: Putini do t'i ndjekë qëllimet e tij me vendosmëri të madhe - me rreziqe të larta edhe për Gjermaninë.
Lufta brutale e agresionit të Rusisë kundër Ukrainës po bëhet gjithnjë e më e rrezikshme. Pavarësisht rezistencës së ashpër dhe sukseseve të dukshme ushtarake, mbrojtja e forcave të armatosura të Ukrainës duket se po pakësohet. Prej ditësh, presidenti ukrainas Volodymyr Zelensky i ka bërë thirrje NATO-s që të krijojë një zonë ndalim-fluturimi mbi vendin e tij për të parandaluar sulmet ajrore ruse.
Ekspertja e sigurisë Marina Henke (39), Profesoreshë e Marrëdhënieve Ndërkombëtare në Shkollën Hertie në Berlin , paralajmëron urgjentisht kundër një hapi të tillë. Në një intervistë me FOCUS Online, ajo tha: "Unë mund të kuptoj se dikush si Selenskyj kërkon me forcë një zonë të ndaluar fluturimi, sepse ai nuk mund ta fitojë luftën vetë dhe është absolutisht i pashpresë." Por pasojat e një vendimi të tillë mund të jenë shkatërruese. - edhe për ne në Gjermani!
Ekspertja i sigurisë Henke: Lufta e Putinit mund të zgjerohet
“Ne do të përballeshim me një rrezik të jashtëzakonshëm me një zonë ndalim-fluturimi mbi Ukrainë. Mendoj se Putini më pas do ta përshkallëzonte konfliktin. Lufta nuk do të lidhej më vetëm me Ukrainën, por do të shtrihej në të gjitha vendet e NATO-s”, thotë Henke, e cila është gjithashtu drejtoreshë i Qendrës për Sigurinë Ndërkombëtare. Në një rast të tillë, Henke sheh rrezikun serioz që do të hidhen raketa edhe në shtetet baltike, "por ndoshta edhe bomba në Berlin, Varshavë, Bruksel apo Paris". Kjo është arsyeja pse duhet "të shmanget absolutisht çdo kontakt i drejtpërdrejtë midis ushtarëve rusë dhe ushtarëve të NATO-s".
Në një zonë ndalim-fluturimi, e njohur gjithashtu si "zona e ndaluar fluturimi", avionët e paautorizuar nuk lejohen të përdorin hapësirën ajrore. Ndalimi do të monitorohej ushtarakisht. Për shkak se Ukraina nuk është në gjendje ta bëjë këtë vetë, forcat e NATO-s do të duhet ta marrin këtë përsipër. Ekspertja e sigurisë Henke: "Së pari, të gjitha sistemet e mbrojtjes ajrore të Rusisë, do të duhej të shkatërroheshin. Kjo do të kërkonte bombardime të rregullta. Dhe atëherë çdo avion luftarak rus që hyn në hapësirën ajrore të Ukrainës, do të duhej të rrëzohej”.
Zona e ndalimit të fluturimeve: "Hapa tepër agresivë"
Henke flet për "hapa tepër agresivë". Kjo do të thoshte që NATO do të hynte në mënyrë aktive në luftë me Rusinë dhe do të bënte hapin e parë. “Putini nuk i shpalli luftë NATO-s, por Ukrainës. Nuk është vetëm një ndryshim semantik”, tha Henke për FOCUS Online. Ajo mendon se është e drejtë që NATO deri tani ka refuzuar rreptësisht një zonë të ndaluar fluturimi. Përndryshe do të ekzistonte një rrezik i jashtëzakonshëm "që vendet e NATO-s do të bëheshin objektiv i agresionit rus".
Por çfarë mund të bëjë Perëndimi, çfarë mund të bëjë NATO për të ndaluar Putinin? Sipas ekspertes së sigurisë, për momentin ekzistojnë vetëm dy mundësi reale për veprim, përveç të gjitha përpjekjeve përmes kanaleve diplomatike. E para: "Vendet individuale të NATO-s mbështesin Ukrainën me furnizime me armë." Opsioni i dytë: "Një bojkot i furnizimeve ruse të naftës, gazit dhe qymyrit".
Evropa blen gazin rus: 'financim për makinerinë e luftës'
Profesoresha Marina Henke në FOCUS Online: “Qeveria e Putinit merr gati një miliard euro në ditë nga vendet e NATO-s për gazin dhe naftën, Gjermania është në ballë. Këto para përdoren gjithashtu për të ushqyer makinerinë e luftës.” Henke vazhdon: “Nëse këto pagesa do të ndërpriteshin dhe lëndët e para nuk do të importoheshin më nga Rusia , do të godiste fort gjoksin e luftës së Putinit.” Fakti që bojkoti nuk është sjellë ende, për shkak të varësisë së madhe të Evropës nga Rusia. Por në sfondin e luftës, Henke paralajmëron: "Ngrirja e menjëhershme e pagesave, do të ishte një hap dramatik, por efektiv".
Marina Henke nuk beson se Kremlini do të ndryshojë mendje së shpejti dhe se gjakderdhja do të përfundojë me tërheqjen e ushtrisë ruse – përkundrazi. Putini ndoshta do të përdorë të gjitha mjetet në dispozicion për të arritur qëllimet e tij të shpallura - "çmilitarizimin dhe denazifikimin e Ukrainës". “Ai dëshiron ndryshimin e regjimit në Ukrainë. Unë pres që rusët të përdorin taktika të ngjashme me ato në Grozny në Çeçeni ose në Alepo dhe Homs në Siri gjatë rrugës. Kjo është absolutisht brutale. Fatkeqësisht, ne do të duhet të llogarisim me një numër shumë, shumë të madh të vdekjeve nga popullsia civile.”
Putin i pamëshirshëm: "Pavarësisht humbjeve"
Ajo ka shpresën se sanksionet e vendosura nga Perëndimi herët a vonë do të kenë një ndikim të dukshëm, ose Putini do të ndeshet me rezistencë në radhët e tij. “Por nëse ky ndryshim nuk vjen, unë shoh vetëm një mundësi: një përshkallëzim rus, me një numër të madh viktimash civile.” Henke kujton se Putini ka “vështirësi të jashtëzakonshme” në pranimin e dobësive apo gabimeve të veta. Përkundrazi, ai i përket atyre njerëzve që thonë: “Tani më shumë se kurrë! Pa marrë parasysh humbjet”.
Sipas Henke, duhet të merret parasysh gjithashtu se Putini mund të përdor armë më të vogla taktike bërthamore. "Do të ishte një hap tjetër, për të përhapur frikë dhe terror - si në Ukrainë ashtu edhe midis NATO-s dhe mbështetësve të saj. Mesazhi i Putinit: Nëse nuk i arrij qëllimet e mia, atëherë do të përshkallëzohem.” Nëse vjen deri te kjo, Perëndimi do të përballet me dilemën tjetër: “A do e injoroni këtë, apo do përpiqeni ta sfidoni Putinin në një farë mënyre?” Henke flet për një "një situatë shumë të ndërlikuar, një situatë që shpresoj të mos ndodhë".
Henke: "Ukraina do të mbetet një vend kryengritës"
Profesoresha ka një pamje relativisht të qartë të së ardhmes së Ukrainës. Teorikisht është e imagjinueshme që qeveria nën Presidentin Zelenskyj të japë dorëheqjen në një moment, për t'i dhënë fund shkatërrimit të vendit dhe katastrofës humanitare. "Në realitet, megjithatë, ne shohim se një patriotizëm i jashtëzakonshëm është zgjuar midis ukrainasve dhe se ekziston një vullnet i pakushtëzuar, për të mbrojtur vendin e tyre." Kjo do të thotë se edhe nëse Kievi do të binte dhe Selenskyj duhej të jepte dorëheqjen nga detyra nën presion, Putin në këtë rast do të fitonte pak nga e gjith kjo.
“Nuk mund ta imagjinoj që Ukraina mund të shtypet në ndonjë mënyrë ose të shndërrohet përgjithmonë në një regjim pro-rus”, tha Henke për FOCUS Online. “Ukraina do të mbetej një vend kryengritës. Këtë e kemi parë shumë gjatë historisë, në Bashkimin Sovjetik, në Afganistan, në Irak” etj.
Gazetari i FOCUS Göran Schattauer, Nga Gjermanishtja Sherif Ramabaja
