Mesazh i gabuar, jo darkë e gabuar! - Bota Sot
Mesazh i gabuar, jo darkë e gabuar!

Opinione

E diel, 21 tetor 2018

Mesazh i gabuar, jo darkë e gabuar!

Nga: Mero Baze Më: 18 mars 2018 Në ora: 20:09
Mero Baze

Arrestimi i Kryetarit të Bashkisë së Lezhës dhe një sërë zyrtarëve të tjerë, po përdoret nga drejtuesit e PD për t’u çuar një mesazh të koduar gjithë drejtuesve të tjerë lokalë të PD, apo çdo zyrtari në detyrë, se besnikëria ndaj PD dhe jo pazari me qeverinë mund t’i shpëtojë.

Në ditën e parë që zyrtarët e Bashkisë së Lezhës u gdhinë në qeli, gazeta zyrtare e PD, u ka kujtuar atyre “darkën e gabuar” me Edi Ramën, disa kohë më parë, dhe e ka vizatuar atë, si një përpjekje të dështuar të tyre, për pazar me një njeri të pabesë si Edi Rama.

Në fakt më shumë se sa për një “darkë të gabuar”, këtu kemi të bëjmë me një mesazh të gabuar.

Ideja se nëse dikush bën pazar me qeverinë, edhe pse është i korruptuar, mund t’i shpëtojë drejtësisë, duket që vjen nga periudha kur PD mbronte çdo zyrtar të saj të korruptuar. Dhe në këtë pikë, PD ndjehet e frikësuar se mos PS u ofron pazar hajdutëve të saj dhe ata mes burgut ose tradhëtisë ndaj PD, zgjedhin të tradhëtojnë PD. Duket qartë se Frrokaj ka qenë në listën e të dyshuarve për tradhëtar të PD, meqë ishte takuar me Edi Ramën dhe PD po e llogariste atë si njeri që Edi Rama mund ta blente duke ja falur arrestimin.

Ndaj dhe mesazhi i PD dukej se ishte më shumë i gëzuar që Rama nuk i kishte mbajtur “besën” Frokajt, se sa që Frokaj po shkonte në burg. Ideja se Frokaj mund t’i shpëtonte burgut nga darka me Edi Ramën, paska qenë torturuese për PD dhe e ka munduar atë si strategji që mund t’i shkatërronte partinë. Tani është duke përdorur arrestimin e Frrokajt, për t’u thënë të gjithëvë ti rrinë larg Edi Ramës, se ai nuk të ndihmon për t’i shpëtuar vjedhjes.

Duke e kthyer në institucion pazarin politik për t’i shpëtuar burgut, PD në fakt vë në dyshim në radhë të parë integritetin e kryetarit të vet të partisë, çështja e të cilit mund të rihapet në çdo kohë dhe përvoja e tij për pazar me Edi Ramën është po ashtu e pranuar nga gjithë palët.

Nëse ecet me logjikën që burgun e ka në dorë pazari me qeverinë, siç po përpiqet PD, kjo mund të krijojë një keqkuptim të madh për PD dhe mund të nxisë një erozion më të madh seç mendon ajo brenda saj.

Nga ana tjetër kjo e bën dhe hipokrite protestën pro Frokajt, pasi njerëzit që PD nxjerr në protestë, duket sikur protestojnë ndaj “pabesisë” së Edi Ramës dhe jo për  pafajsinë e tij.

Sjellja e PD zyrtare ndaj këtyre arrestimeve, tregon në të vërtet klimën e pasigurisë që rrethon stafin e Lulzim Bashës dhe idenë fikse se atij mund t’ia marrin njerëzit duke përdorur të shkuarën e tyre.

Në vend që një arrestim i tillë të shërbente për të dëshmuar një qëndrim parimor dhe distancë nga puna e drejtësisë, në fakt po shërben për të treguar tensionin që ekziston brenda PD për besnikërinë e njerëzve ndaj Bashës.

Ti kujtosh tjetrit ditën që është në burg, se ke ngrënë darkë me Edi Ramën dhe prap nuk ja ke dalur dot, do të thotë t’i japësh prioritet besnikërisë ndaj Bashës mbi problemet e tjera që mund të kesh me ligjin. Është një mesazh që sa më i korruptuar të jesh, aq më besnik duhet të jesh ndaj kryetarit. Edhe pse kjo s’do të thotë se do të shpëtosh, por mund të arrestohesh si hero.

Shfaq komentet
comments powered by Disqus
Sot mund të lexoni Shfletoni kopertinat
Sondazh
test