Rreth 300 banesa pritet të shemben për shkak të projektit të devijimit të shtrati të lumit Lana në zonën e Astirit. Për të kundërshtuar këtë banorët e zonës u janë rikthyer protestave, me akuza për kryetarin e bashkisë Erion Veliaj.
“Vjen bashkia e Tiranës, hajdutët dhe kriminelë, vinë dhe na futen brenda portave në mesditë sikur të kishim vjedhur. Poshtërsi kanë bërë ata. I kam thënë “t’u bëftë pushka top” po u fute brenda portës sime se 200 metra larg e ke Lanën.”
“Pse devijohet lumi, nuk është rehabilitim. Është masakër, nuk është projekt”.
Thonë se nuk kundërshtojnë zhvillimin e zonës, por kjo nuk mund të bëhet në kurriz të tyre ndaj kërkojnë dëmshpërblim për të gjithë.
Ata akuzojnë bashkinë e Tiranës se i gënjeu kur u tha në sy të Bankës Europiane se do t’i dëshmpërblejë të gjithë njësoj.
“Ata thonë do u prishim shtëpitë, do u japim bonusin e qirasë dhe pas 2 -3 vitesh bashkia do të ndërtojë 1 apo dy pallate për të na sistemuar ne. Ne kemi shembullin e qartë te Unaza e Re, asnjë nuk ka marrë bonusin e qirasë të premtuar nga Veliaj. Janë mashtrime dhe propagandë”.
“Këtu ka edhe vepër penale.”
Po ashtu banorët e Astirit akuzojnë se nuk ka transparencë për projektin përfundimtar, pasi ka devijim nga ai që ishte në fillim dhe ku parashikohej të prisheshin shumë më pak shtëpi.