Partia “Zgjidhja” denoncoi indiferencën e qeverisë ndaj qindra familjeve që janë përmbytur për të dytën herë brenda dy muajve të fundit. Në një reagim në Facebook, partia e drejtuar nga Koço Kokëdhima, deklaroi se qeveria po pret të dalë dielli që të shkojë në ndonjë shtëpi të përmbyturi për të dalë në televizion.
Deklarata e “Zgjidhja”-s
Banorët e Ferrasit në Fier dhe të shumë fshatrave të tjerë në Ultësirën Perëndimore, prej dy ditësh zgjohen sërish të përmbytur plotësisht. Ende pa u tharë nga shiu i dhjetorit 2017, banesat, pronat, gjëja e gjallë, prodhimet dhe bizneset e tyre u shkatërruan sërish prej një shiu të zakonshëm dimri. Qeveria nuk luajti as gishtin prej përmbytjes së dhjetorit. Jo vetëm nuk shpalli gjendjen e jashtëzakonshme, që të ndihmonte me buxhetin e shtetit familjet e dëmtuara, por as nuk mori asnjë masë që uji të mos përmbyste sërish fushat. Qeverisja u krenua me ditë-netët pa gjumë të ushtarëve të thjeshtë nga Shqipëria dhe Kosova, që ndihmuan banorët e përmbytur dhe ndihmat bujare që dhanë bizneset në të dyja vendet për fermerët e falimentuar. Ajo po pret të pushojë shiu, që uji të tërhiqet vetë dhe ministrat dhe kryeministri të shkojnë në ndonjë familje bashkë me kamerat për të treguar “ndihmën e madhe” që po u jep sërish qeveria. Qeveria vjen aty çdo ditë me taksidarër e saj për ujin, energjinë dhe sahatët e puseve.
ZGJIDHJA është e vetmja forcë politike që do transferojë sovranitetin te populli, do të bëjë qeverinë e qytetarëve dhe do t’u japë fund katastrofave të tilla, paaftësisë dhe papërgjegjshmêrisë vrasëse, mjerimit, varfërisë, padrejtësisë, shtypjes së pamëshirshme dhe shpopullimit të vendit.
ZgjidhjaPërQytetarët