Zjarrfikësit tetovarë largojnë gjarpërin nga një banesë në katin e pestë

Tetova

Zjarrfikësit tetovarë largojnë gjarpërin nga një banesë në katin e pestë

Më: 25 maj 2022 Në ora: 20:11

Zjarrfikësit e Tetovës kanë intervenuar menjëherë pas thirrjes së një banoreje të një pallati në rrugën “Borçe Koçovski” në Tetovë, duke kapur një gjarpër që kishte hyrë në banesën e denoncueses në katin e pestë.

Ndërhyrja rezultoi e suksesshme, gjarpri u kap me shpejtësi dhe u largua në mënyrë të sigurtë nga banesa.

“Thirrja në qendrën e zjarrfikësve ka ardhur rreth orës 18:30. Një grua e cila ishte shumë e frikësuar telefonoi dhe na thirri që të vinim menjëherë. Kemi një shufër të përshtatshme, një shkop me të cilin i kapim gjarpërinjtë. Kështu ne kemi arritur ta nxjerrim gjarprin nga banesa dhe ta dërgojmë në një institucion të përshtatshëm”, tha Uka Aliti, komandant i njësitit të zjarrfikësve për territorin e qytetit të Tetovës.

Kjo nuk është ndërhyrja e tyre e parë e tillë e pazakontë.

Vetëm gjatë këtij viti zjarrfikësit tetovarë kanë ndërhyrë shtatë herë për largimin e gjarpërinjve nga objekte të ndryshme.

“Deri më tani i kemi nxjerrë gjarpërinjtë nga automjetet apo oborret, por është hera e parë që kemi larguar një gjarpër që ka hyrë në një banesë në Tetovë, madje në katin e pestë. Gjarpërinjtë më së shumti hyjnë në oborre kur është ngrohtë dhe në makina kur njerëzit dalin në natyrë. Në raste të tilla na kërkojnë gjithmonë, sepse kemi pajisjet e duhura për ndërhyrje të tilla”, sqaron Aliti.

Ai apelon qytetarët që të kenë kujdes dhe të mos bëjnë asgjë për largimin e gjarpërinjve, por të thërrasin zjarrfikësit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat