Të paktën 12 persona janë vrarë dhe tre të tjerë u rrëmbyen pasi persona të armatosur sulmuan një vend minierash në fshatin Atoso, në shtetin e trazuar Plateau të Nigerisë.
Dalyop Solomon Mwantiri, që drejton Shoqatën e Rinisë Berom (BYM), deklaroi se sulmuesit, të cilët banorët i identifikuan si milicia e armatosur Fulani, goditën të martën vonë, duke lënë pesë persona të tjerë të shtruar në spital me plagë nga armët e zjarrit.
Zëdhënësi i policisë, Alfred Alabo, konfirmoi se hetimet janë duke u zhvilluar.
Reuters shkruan se sulmi i fundit nënvizon pasigurinë e vazhdueshme në Plateau, një pikë e nxehtë e rajonit të paqëndrueshëm të mesit të Nigerisë, ku përplasjet etnike dhe fetare kanë nxitur prej kohësh konflikte vdekjeprurëse mes fermerëve dhe barinjve. Dhuna vazhdon të rritet pavarësisht premtimeve të përsëritura të qeverisë për rikthimin e paqes.
Sulmi i së martës ndodhi vetëm disa ditë pasi katër fëmijë u vranë në një fshat aty pranë, tha Mwantiri, duke akuzuar autoritetet se kanë injoruar shenjat e hershme paralajmëruese. BYM po i bën thirrje qeverisë të dërgojë më shumë forca sigurie për të zbatuar ndalimin e kullotjes së hapur dhe për të shpëtuar viktimat e rrëmbyera.
