Kryeministri i Kosovës, Ramush Haradinaj, ka folur rreth mundësisë së shkarkimit të ministrave të tjerë në Qeverinë e Kosovës nga radhët e Listës Serbe, pasi ata tash e sa kohë janë duke bojkotuar punën.
Pas shkarkimit të kohë më parë të ministrit të Bujqësisë Nenad Rikallo dhe zëvendësimit të tij me Dijana Zhiviq, kryeministri Haradinaj ka përkujtuar se ministrat Nenad Rikallo, Ivan Todosijeviq dhe Dalibor Jevtiq, të cilët vijnë nga Lista Serbe tash e sa kohë kanë ngrirë pozitën e tyre.
Paralajmërimet se ministrja e sapoemëruar e Bujqësisë Dijana Zhiviq nuk përfaqëson interesat e serbëve, Haradinaj i ka quajtur të sinqerta, derisa ka bërë me dije se nuk do të ketë shkarkime tjera të ministrave nga radhët e Listës Serbe.
Haradinaj: Nuk do të ketë shkarkime të ministrave tjerë serbë
“Nuk kemi qëllime të tilla, mendoj se do të ishte më mirë që ata të kthehen në punë, por nuk kemi në plan të shkarkojmë dikë tjetër”, tha Haradinaj.
Për më tepër, kreu i Ekzekutivit theksoi se kthimi i Listës Serbe në Kuvend do të ishte lajm i mirë për të gjithë dhe shpreson se ata do të ndërmarrin një hap të tillë, pasi do të ishte në interes edhe të komunitetit serb që jeton në Kosovë.
