(E plotësuar) - Ministri Matoshi refuzon përfaqësimin e Kosovës në mënyrë të pabarabartë me shtetet tjera, në konferencën ministrore për Ballkanin Perëndimor
Ministri i Mjedisit dhe Planifikimit Hapësinor, Fatmir Matoshi, ishte i ftuar për të marrë pjesë në konferencën ministrore për Ballkanin Perëndimor “Veprimi Rajonal i Klimës në Ballkanin Perëndimor” që po mbahet në Tiranë, organizuar nga Programi i Kombeve të Bashkuara, Organizata e Kombeve të Bashkuara për Ushqimin dhe Bujqësinë dhe Qeveria e Republikës së Shqipërisë, me mbështetjen financiare të Ministrisë së Mjedisit të Republikës Çeke.
Në pritje të fillimit të ceremonisë zyrtarë të kësaj konference ministri Matoshi, posa ka kuptuar që shteti i Kosovës po përfaqësohet në mënyrë të pabarabartë dhe nën shoqërimin e zyrtarëve të UNMIK-ut, ka vendosur që të bojkotojë këtë konferencë në shenjë protestë për mënyrën e përfaqësimit.
“Për këtë arsye tashmë konferenca më tepër do të zhvillohet në nivel teknik, kurse ne do të shfrytëzojmë këtë konferencë si mundësi që të takojmë donatorë për të diskutuar me ta dhe për të kërkuar mbështetjen e tyre për projektet tona në vazhdimësi” ka deklaruar ministri Matoshi.
Matoshi tha po ashtu se lufta për një mjedis të pastër nuk mund të arrihet duke përjashtuar Kosovën nga projektet ose vendimmarrja në konferenca të përbashkëta.
“ U kam thënë edhe zyrtareve të Kombeve të Bashkuara që askush nuk duhet të ëndërroj që do të këtë një mjedis të pastër, një luftë efikase ndaj ndryshimeve klimatike në Ballkanin Perëndimor, nëse ende ka ëndrra të tilla që një vend mund të përjashtohet nga projektet ose nga vendimmarrja dhe tryezat e përbashkëta”.
Vlen të përmendim që pas bojkotimit të konferencës nga ministri Matoshi, këtë konferencë ka bojkotuar edhe ministri i mjedisit të Shqipërisë, Blendi Klosi, si nikoqir i këtij takimi.
Qëllimi i konferencës ministrore ishte të lehtësohej qasja në financimin e klimës, duke përfshirë angazhimin dhe qasjen në Fondet e Klimës. Rezultati i konferencës pritej të jetë miratimi i një deklarate që miraton “Udhërrëfyesin e Përbashkët për Rajonin e Ballkanit Perëndimor- Përshpejtimin e Qasjes në Financat Klimatike”, që do të zbatohet më vonë përmes konceptimit dhe zhvillimit të projekteve dhe programeve të përbashkëta rajonale.
***
Një incident diplomatik është shënuar në Tiranë nga delegacioni i qeverisë serbe. Delegacioni nga Beogradi nuk ka pranuar të ulet në të njëjtën tryezë me delegacionin nga Kosova në Konferencën për Klimën në Ballkanin perëndimor, nisur nga fakti se Kosova nuk njihet nga OKB dhe OKB është organizatorja e takimit.
Por, ministri kosovar Fatmir Matoshi deklaroi se kjo është e papranueshme: “Ka rregulla strikte të OKB, – tha ai, – që kërkojnë që Kosova dhe më tej të jetë e përfaqësuar nën siglën e UNMIK ose nga persona të qeverisë së Kosovës, por të shoqëruar nga zyrtarë të UNMIK-ut, gjë që për Republikën e Kosovës është e papranueshme dhe nuk do të ndodhë më asnjëherë!”
Konferenca Ministeriale për Rajonin dhe Ballkanin Perëndimor me temë “Aksioni Rajonal mbi Klimën në Ballkanin Perëndimor” duhet të niste në orën 10:00 në Tiranë me pjesëmarrjen e ministrit të Mjedisit Blendi Klosi dhe delegacioneve nga Kosova, Serbia, Mali i Zi dhe donatorë të huaj.
