Të paktën 15 shtetas amerikanë janë rrëmbyer në Haiti, raporton BBC.
Incidenti ka ndodhur pranë Port-au-Prince të Haitit kur një bandë e armatosur ka rrëmbyer një grup misionarësh amerikanë dhe anëtarët e familjes së tyre, përfshirë fëmijë. Ata u zbritën nga një autobus pasi vizituan një jetimore, thanë burimet e sigurisë të Haitit për mediat.
Ende nuk dihen shumë detaje, por zyrtarët amerikanë thanë se ishin në dijeni të raporteve.
Bandat e armatosura kanë kontrolluar zonat më të varfra të kryeqytetit të Haitit prej vitesh. Kohët e fundit ata kanë zgjeruar kontrollin e tyre në pjesë të tjera të kryeqytetit të Haitit Port-au-Prince dhe zonat e tij periferike.
Haiti ka një nga nivelet më të larta të rrëmbimit në botë, pasi bandat e fuqishme shfrytëzojnë situatën e brishtë të funksionimit të ligjit për të fituar para nga pagesat e shpërblimit.
Që nga vrasja e presidentit, Jovenel Moise në korrik, fraksionet rivale janë përpjekur të marrin kontrollin dhe mungesa e sigurisë është rritur.
Misionarët e krishterë u kapën menjëherë pasi u larguan nga një qytet dhe vazhdojnë të mbahen nga bandat, sipas një burimi të sigurisë të cituar nga agjencia e lajmeve AFP.
Ministria e Drejtësisë e Haiti dhe Policia Kombëtare nuk kanë komentuar raportet.
Qeveria amerikane ende nuk ka dhënë ndonjë informacion për incidentin, por Departamenti i Shtetit i tha AFP-së se ishte njoftuar me raportet dhe se siguria e qytetarëve amerikanë jashtë vendit është një nga përparësitë kryesore.
