Instituti George W. Bush në Teksas ka renditur zonat metropolitane në të gjithë Amerikën ku emigrantët kanë gjetur mbështetje dhe po përparojnë. Ekipi i Zërit të Amerikës ishte në qytetin Kolorado Springs të shtetit Kolorado, një zonë me prirje konservatore, i cilësuar si një nga qytetet më të mira amerikane për emigrantët.
Karthick Radunath Palanimalai është konsulent për programet kompjuterike. Pasi mbërriti në Shtetet e Bashkuara me vizë pune L1, ai thotë se qyteti Kolorado Springs nuk e ndihmoi që të vendosej aty. Por ai gjeti mbështetje tek komuniteti indiano-amerikan në qytet.
“Më ndihmuan të merrja me qira një apartament pranë vendit të punës dhe qendrës tregtare. Ata mu gjenden pranë gjatë tre muajve të parë”, tregon për Zërin e Amerikës zoti Palanimalai.
Jackie Jaramillo me organizatën “Centro de la Familia” thotë se të ardhurit si Palanimalai janë shpesh të padukshëm dhe të izoluar.
“Është shumë e vështirë. Ka shumë pengesa institucionale dhe kulturore. Sigurisht që ka racizëm. Shumë emigrantë, të cilëve u shërbejmë, janë viktima të krimit”.
Shumë njerëz u habitën nga vlerësimi i Institutit George W. Bush për qytetin Kolorado Springs, duke e renditur atë në vendin 21 nga 100 qytetet metropolitane më të mira në Shtetet e Bashkuara ku emigrantët përparojnë.
Qyteti Kolorado Springs njihet për Akademinë e Forcave Ajrore të Shteteve të Bashkuara dhe majën “Pikes Peak”, 4302 metra mbi nivelin e detit. Qyteti ka një administratë konservatore dhe shumë prej republikanëve e kundërshtojnë hapur kalimin e paligjshëm të kufirit.
“Nuk mendoj se kemi një tabelë që thotë - Qyteti Kolorado një vend i mirë për migrantët”.
Republikani John Suthers është kryebashkiak i qytetit Kolorado Springs dhe po shërben në mandatin e dytë. Në vitin 2022, Instituti Milken e renditi qytetin në vendin e nëntë për arritjet ekonomike mes qyteteve të mëdha amerikane, një magnet për emigrantët me aftësi të larta, të autorizuar për të punuar në Shtetet e Bashkuara.
“Kemi një bazë të madhe ushtarake dhe mbrojta përbën rreth 40% të ekonomisë së qytetit. Ka shumë vende pune në fusha si teknologjia e lartë, hapësira, apo siguria kibernetike. Shumë nga ata që po emigrojnë në përputhje me ligjet kanë ekspertizën e duhur. Përse të mos vinë në Kolorado Springs”, thotë për Zërin e Amerikës kryebashkiaku John Suthers.
Cullum Clark është autori i raportit të Institutit George W. Bush, "Emigrantët dhe mundësitë në qytetet e Amerikës". Ai thotë se renditja u bë në bazë të disa faktorëve.
“A është një vend i mirë për të bërë biznes, për të filluar një kompani, për të bërë karrierë dhe përballuar blerjen e një shtëpie?”
Zoti Palanimalai është dakord. I sapomartuar, edhe gruaja e tij gjeti një punë në fushën e teknologjisë në qytetin Kolorado Springs. Tashmë në shtëpinë e tyre ata po shijojnë peisazhet e Maleve Shkëmbore, duke u angazhuar edhe me ekipet sportive lokale./VOA
