Presidenti i SHBA-së, Donald Trump, dhe ambasadori i Izraelit në SHBA dënuan të shtënat të mërkurën vonë pranë Muzeut Hebraik të Kryeqytetit në Uashington, ku u vranë dy anëtarë të stafit të Ambasadës Izraelite, duke e quajtur atë një akt dhune antisemite.
“Këto vrasje të tmerrshme në Uashington, të bazuara padyshim në antisemitizëm, duhet të marrin fund, TANI! Urrejtja dhe radikalizmi nuk kanë vend në SHBA”, shkroi Trump në platformën e tij Truth Social.
Ai u shprehu ngushëllime familjeve të viktimave, duke e quajtur incidentin "shumë të trishtueshëm".
Në një konferencë për shtyp pas sulmit, ambasadori izraelit në SHBA, Yechiel Leiter, tha se viktimat ishin një çift i ri izraelit që ishin gati të fejoheshin.
"I riu bleu një unazë këtë javë me qëllim që t'i propozonte të dashurës së tij javën tjetër në Jerusalem", tha ai, duke i përshkruar ata si një "çift të bukur" që kishin ardhur për të shijuar një mbrëmje në qendrën kulturore të Uashingtonit.
Ai tha se Trump e telefonoi personalisht nëpërmjet Prokurores së Përgjithshme Pam Bondi, duke u zotuar se administrata e tij do të "bënte gjithçka që mundej për të luftuar dhe për t'i dhënë fund antisemitizmit", transmeton AA.
Leiter theksoi unitetin midis Izraelit dhe SHBA-së.
"Së bashku nuk do të kemi frikë. Së bashku do të qëndrojmë dhe do ta kapërcejmë shthurjen morale të njerëzve që mendojnë se do të arrijnë përfitime politike përmes vrasjes", tha ai.
Ambasadori izraelit në OKB, Danny Danon, gjithashtu reagoi ashpër ndaj incidentit, duke shkruar në X: "Të shtënat fatale që ndodhën jashtë vendit të ngjarjes që u zhvillua në Muzeun Hebraik në Uashington, D.C. janë një akt i çoroditur i terrorizmit antisemit.
"Jemi të bindur se autoritetet amerikane do të ndërmarrin veprime të forta kundër atyre që janë përgjegjës për këtë akt kriminal. Izraeli do të vazhdojë të veprojë me vendosmëri për të mbrojtur qytetarët dhe përfaqësuesit e tij - kudo në botë", tha ai.
