​CIA po shqyrton një komplot për të rrëzuar qeverinë e Venezuelës

Amerika

​CIA po shqyrton një komplot për të rrëzuar qeverinë e Venezuelës

Më: 23 nëntor 2025 Në ora: 19:31
Foto ilustrim

Shërbimi sekret amerikan po shqyrton nisjen e operacioneve të fshehta në një përpjekje për të rrëzuar qeverinë e Nicolas Maduros në Venezuelë.

Shtetet e Bashkuara po përgatiten të nisin një fazë të re të operacioneve të lidhura me Venezuelën në ditët në vijim, thanë katër zyrtarë.

Nuk ishte e qartë nëse presidenti i SHBA-së Donald Trump kishte marrë një vendim përfundimtar se cilat operacione do të nisnin ose kur do të vepronin.

Kjo vjen pas javësh raportimesh se SHBA po shqyrton veprime ushtarake, me vendosjen e forcave në Karaibe mes përkeqësimit të marrëdhënieve me Venezuelën.

Dy zyrtarë amerikanë thanë se operacionet e fshehta ka të ngjarë të jenë pjesa e parë e veprimit të ri kundër presidentit Maduro. Një zyrtar i lartë i administratës nuk përjashtoi asgjë në lidhje me Venezuelën.

"Presidenti Trump është i përgatitur të përdorë çdo element të fuqisë amerikane për të ndaluar drogën që të vërshojë në vendin tonë dhe për të sjellë ata që janë përgjegjës para drejtësisë", tha zyrtari në kushte anonimiteti për mediat britanike, përcjell Telegraph.

Administrata Trump ka menduar të sulmojë Venezuelën për të luftuar atë që e ka portretizuar si rolin e Maduro në furnizimin me drogë, por ky i fundit ka mohuar akuzat.

Presidenti venezuelas, i cili feston datëlindjen e 63-të të dielën, u shfaq në teatrin kryesor të Karakasit të shtunën për premierën e një serisë televizive të bazuar në jetën e tij.

Një grumbullim ushtarak në Karaibe ka qenë duke u zhvilluar prej muajsh dhe Trump tashmë ka autorizuar operacione të fshehta të CIA-s në Venezuelë.

Administrata Federale e Aviacionit të SHBA-së të premten paralajmëroi linjat ajrore kryesore për një "situatë potencialisht të rrezikshme" kur fluturonin mbi Venezuelën dhe i nxiti ato të tregonin kujdes.

Tri linja ajrore ndërkombëtare anuluan fluturimet që niseshin nga Venezuela të shtunën pas paralajmërimit të FAA-s.

Shtetet e Bashkuara planifikojnë të hënën ta shpallin Cartel de los Soles një organizatë të huaj terroriste për rolin e saj të dyshuar në importimin e drogës në Shtetet e Bashkuara, thanë zyrtarët. Administrata Trump e ka akuzuar Maduro se drejton Cartel de los Soles, gjë që ai e mohon.

Trupat amerikane kanë kryer të paktën 21 sulme ndaj anijeve të dyshuara për drogë në Karaibe dhe Paqësor që nga shtatori, duke vrarë të paktën 83 persona.

Në gusht, Uashingtoni dyfishoi shpërblimin e tij për informacionin që çon në arrestimin e Maduro në 50 milionë dollarë. CIA nuk pranoi të komentojë pretendimet për komplot, shkruan Telegraph.

comment Për komente lëvizni më poshtë
Sot mund të lexoni Shfletoni kopertinat