Presidenti i Rusisë, Vladimir Putin, tha se plani i Shteteve të Bashkuara për tërheqje nga një pakt për kontrollin e armëve është "konsideruar keq" dhe paralajmëroi se Moska do të ndjekë shembullin nëse Uashingtoni tërhiqet nga Traktati i Forcave me Rreze të Mesme, i vitit 1987.
Putin i bëri këto këto komente një ditë pasi sekretari amerikan i Shtetit, Mike Pompeo, tha në një takim të NATO-s në Bruksel se Uashingtoni do ta braktisë traktatin pas 60 ditësh, nëse Moska nuk i çmonton raktetat që SHBA konsideron se përbëjnë shkelje të marrëveshjes.
"Është e thjeshtë për SHBA-në të fajësojë Rusinë. Por, ky nuk është rasti. Ne jemi kundër shkatërrimit të traktatit", tha Putin.
"Çfarë do të bëjmë ne në përgjigje? Shumë thjesht: do ta bëjmë të njëjtën", tha Putin.
Më herët, Valery Gerasimov, shef i shtabit të përgjithshëm të forcave të armatosura ruse, tha se tërheqja e SHBA-së nga traktati "do të ishte një hap i rrezikshëm që do të mund të ndikonte negativisht jo vetëm në sigurinë evropiane, por në të gjithë stabilitetin strategjik".
Traktati SHBA-Rusi, i cili daton nga Lufta e Ftohtë dhe ka eliminuar një klasë të tërë të raketave nga Evropa, konsiderohet kyç për stabilitetin strategjik mes Uashingtonit dhe Moskës.
